PDC hakarak hamosu ministériu kultura-relijiaun iha Timor-Leste
MANATUTO, 03 maiu 2023 (TATOLI)—Prezidente Partido Democrata Cristão (PDC), Francisco de Araújo, hateten bainhira povu fó konfiansa kaer ukun mak PDC sei hamosu ministériu rua mak ministériu kultura no ministériu relijiaun nian iha Timor-Leste.
Notísia Relevante: PDC prioritiza infraestrutura bázika no oferese elétrika gratuita ba Povu
“Ita hakarak hamosu tan ministériu rua mak Ministériu Kultura no Ministériu Relijiaun, tanba ita hatene katak durante ne’e Ministériu rua ne’e laiha. Nune’e kultura hahú menus ba beibeik no neineik ita-nia kultura fila an ba kultura modernu,” nia hateten iha kampañia eleitorál ho tipu door-to-door iha Manatuto Vila, kuarta ne’e.
Nia hatutan, durante ne’e ministériu relijiaun laiha mezmu Timor-Leste iha relijiaun katólika, protestante musulmanu no seluk tan.
“Tanba liga ho relijiaun ne’e buat hotu-hotu tenke liuhosi sosiedade sívil mak SASCAS ne’e, ita hakarak hamosu ministériu, nune’e bele la’o diretamente,” nia hateten.
Nune’e, PDC sei defende desentralizasaun poder no polítika ba munisípiu no postu atu foti desizaun bazeia ba lema fiar malu hamutuk la’o ba oin.
Guvernu sentrál sei aloka orsamentu no matadalan polítika, administrasaun no ezekusaun nian ba sira atu tuir maibé desizaun iha sira ninia liman atu halais prosesu dezenvolvimentu ida ekitavel no inkluzivu.
“Ita hakarak iha orsamentu jerál mai ne’e, ita foka liu ba desentralizasaun poder lokál, tanba ita hakarak osan ne’e tenke hahú hosi xefe suku no aldeia sira. Sira tenke iha orsamentu rasik nune’e sira bele jere,” nia dehan.
PDC sei nakfilak orsamentu insentivu ba xefe suku no xefe aldeia ba saláriu mensál inklui PDC sei aumenta mós insentivu désimu terseiru ba idozu no veteranu sira no mós dezena atividade kreativa ba sira iha suku no aldeia.
PDC sei hasae saláriu funsionáriu públiku no halo reveizaun ba saláriu polítiku no Asesór sira nian atu kria sosiedade ida ekilibru no inkluzivu.
Aleinde ne’e, PDC mós planu atu hamosu sidade foun Timor-Leste, muda Dili sai sidade indústria no muda kapitál ba Manatuto ka fatin seluk ne’ebé di’akliu.
“Hanesan sidade Dili iha indústria oioin mak tau hamutuk iha ne’ebá, entaun ami hanoin muda sidade Dili ba fatin ne’ebé di’ak,” nia hateten.
Seluk mak hamosu Ministériu Dezenvolvimentu Setór Privadu ne’ebé sei tau matan ba kriasaun setór privadu no dezenvolvimentu ekonómia.
Jornalista : Osória Marques
Editór : Cancio Ximenes
