DILI, 03 maiu 2023 (TATOLI)–Primeiru-Ministru (PM), Taur Matan Ruak, hato’o votu felisitasaun ba jornalista sira hotu iha mundu tomak, partikularmente iha Timor-Leste ne’ebé ohin selebra ‘loron mundiál liberdade imprensa’.
“Lori ha’u-nia naran rasik no VIII Governu nia naran, hakarak hato’o votu felisitasaun ba jornalista sira iha mundu tomak, espesialmente ba jornalista timor-oan sira hotu, ba imi-nia loron espesiál ohin,” PM Taur hato’o apresiasaun ne’e liuhosi nota ne’ebé Agência Tatoli asesu, kuarta ne’e.
Xefe Governu konsidera loron 03 maiu nu’udar loron espesiál ida ba jornalista sira, hanesan mós loron ne’ebé Nasaun Unida adota hanesan loron mundiál liberdade imprensa hodi fó hanoin ba país hotu iha mundu tomak atu respeita liberdade imprensa.
Notísia relevante : PR Horta hamutuk ho jornalista defende liberdade imprensa
Tuir índise liberdade imprensa mundiál nian, hatuur Timor-Leste iha pozisaun 17 iha nível globál no númeru 1 iha nível Sudeste Aziátiku.
“Ne’e hatudu katak ita-nia nível iha avansu di’ak tebes iha Sudeste Áziatiku, bainhira ita kompara ho país balun ne’ebé ukun-an kleur ona, sira-nia liberdade imprensa sei dook liu hosi ita-nian. Ne’e hatudu katak liberdade imprensa iha ita-nia nasaun, nia iha fatin. Hanesan Primeiru-Ministru, ha’u orgullu no ita hotu tenke orgullu ba prestasaun ida-ne’e,” Eis Xefe Estadu tenik.
PM salienta, Governu respeita tebes liberdade imprensa no iha vontade atu kontinua apoiu insituisaun mídia sira hodi kontinua hala’o sira-nia knaar ho independente, imparsialidade, responsabilidade no respeitu ba kódigu étika jornalista nian nu’udar pilár importante ba ita-nia demokrasia.
“Ita-nia país daudaun ne’e iha hela períodu kampaña eleitorál ba Eleisaun Parlamentár iha loron 21 maiu 2023 nian. Iha situasaun sira hanesan ne’e, jornalista sira-nia papél importante hodi fó kontribuisaun oinsá tulun ita-nia Estadu iha divulgasaun informasaun ne’ebé loos, justu, kredível no mais edukativu atubele ajuda ita-nia Estadu iha situasaun ida-ne’e,” Taur dehan.
Biban ne’e, Primeiru-Ministru agradese ba jornalista hotu nia kontribuisaun durante ne’e, ne’ebé hato’o ona informasaun ba públiku sira relativa ho atividade Governativa nian, maski hasoru difikuldade oin-oin iha terrenu, maibé nafatin iha vontade, badinas no profisionalizmu.
“Ba ida-ne’e, ha’u-nia hakuak boot ba imi hotu no dala-ida tan parabéns. Viva liberdade imprensa. Viva jornalista Timor-Leste,” nia konklui.
Jornalista : Antónia Gusmão
Editora : Julia Chatarina
