PR Horta hamutuk ho jornalista defende liberdade imprensa
DILI, 25 outubru 2022 (TATOLI)— Prezidente Repúblika, José Ramos Horta, hateten nia parte prontu hamriik ho jornalista hodi defende Liberdade Imprensa, nune’e jornalista sira iha liberdade hodi hakerek tuir faktu no lia-loos.
Notísia relevante: CI konsidera komandu PNTL tenta kriminaliza produtu jornalizmu
Xefe Estadu hato’o nia posizaun ne’e relasiona ho karta notifikasaun hosi Polisia Nasionál Timor-Leste (PNTL), liuhosi Servisu Investigasaun Kriminiál Nasionál, ho númeru ofísiu 112/Gab/CHEFE/SIC/PNTL/X/2022, ba Jornal Diáriu INDEPENDENTE ho nia sentidu urjente atu halo identifikasaun ba Jornalista Domingos Gomes ho Xefe Redasaun, Jorginho Dos Santos, tuir kódigu Prosesu Penál artigu 53 tanba deskonfia komete krime.
Notísia relevante: TLPU ezije komandu PNTL anula karta notifikasaun ba Independente
“Ha’u sei buka hamriik iha jornalista nia-kotuk, iha jornál nia kotuk, atu defende direitu no liberdade atubele hakarek. Ha’u sei haree ida ne’e. Ha’u nu’udar Xefe Estadu, ha’u sei akompaña ida ne’e,” hatete PR Horta, iha Kuartél Jenerál-F-FDTL-Fatuhada-Dili, tersa ne’e.
Tuir Xefe Estadu katak parte justisa tenke preokupa ho krime organizadu, ema halo passaporte falsu, droga ou ema buka halai sai ho osan hosi Timór arbiru la tuir regra.
“Ida ne’e maka ita tenke haree hamutuk la’ós ita ba preokupa fali ho jornalista sira nia serbisu”, Xefe Estadu lamenta.
Notísia relevante: Kazu Komandu PNTL notifika Independente, AJTL sei haruka karta ba Xefe Estadu
Jornalista:Natalino Costa
Editór : Florencio Miranda Ximenes
