Populasaun 300-resin iha Remexio seidauk asesu energia eletríka
AILEU, 03 abríl 2023 (TATOLI) – Administradór Postu Administrativu Remexio Gastão Mendonça ‘Tigri’, informa iha postu ida ne’e, populasaun hamutuk 300-resin mak seidauk asesu ba energia elétrika.
“Se ita koalia kona-ba eletridade suku sira iha Remexio, só iha aldeia hosi Suku Fadabloko nian mak seidauk asesu ba eletrisidade. Tanba aldeia ne’e nia distánsia dook no populasaun mós hela dook malu. Populasaun hosi aldeia ne’e totál 300”, Gastão Mendonça hateten ba jornalista iha Aileu Vila, kuarta ne’e.
Nia dehan, agora daudaun, Governu hahú loke konkursu hodi kontrata kompañia ida atu halo prosesu eletrifikasaun iha fatin refere, espera kompañia bele hahú no akontese tinan ne’e.
“Maibé husu ba Governu foun ne’ebé mak atu mai tenke tau matan nafatin ba problema sira hodi kontinua tau atensaun ba povu nia moris tanba povu hein hela”, nia dehan.
Postu Administrativu Remexio Munisípiu Aileu kompostu hosi Suku Fadabloco, Fahisoi, Faturasa, Hautoho, Liurai, Maumeta no Tulataqueo ho populasaun hamutuk 15.000-resin.
Jornalista: Natalino Costa
Editór : Zezito Silva
