Governu inaugura projetu komunitária 15 iha Covalima

COVALIMA  04 maiu 2023 (TATOLI)–Governu liuhosi Ministru Edukasaun Juventu no Desportu (MEJD), Armindo Maia, kuarta ne’e, inaugura projetu komunitária ba reabilitasaun no konstrusaun eskola 15 iha Covalima liuhosi prosesu entrega plaka ba Servisu Edukasaun Covalima.

Notísia Relevante: Edukasaun Covalima halo ona pagamentu finál ba projetu komunitária 15

“Serimónia entrega plaka hanesan faze finál ida liuhosi faze ida naruk, ita simu lista eskola ne’ebé ita atu hadi’a no harii halo dezeñu, ho buat sira-ne’e hotu to’o halo konstrusaun no inaugurasaun ohin entrega plaka,” Ministru Armindo Maia hateten ba jornalista sira hafoin entrega palaka, iha Eskola Ensinu Sekundáriu Jerál (ESG) Suai.

Serimónia inaugurasaun ba faze dahuluk dirije hosi Primeiru-Ministru, Taur Matan Ruak, iha munisípiu Baucau eskola hamutuk 94 no inaugurasaun faze daruak nian iha Maliana ba eskola hamutuk 59.

Implementasaun projetu komunitária ba reabilitasaun no konstrusaun eskola hamutuk 15 iha Covalima ne’e, finaliza ona halo konstrusaun no ohin tama ona iha faze inaugurasaun, tanba ne’e husu ba komunidade, estudante no estudante nia inan-aman sira tenke kuidadu.

“Iha Covalima ohin ita hotu rona katak eskola hamutuk 15 inaugura ona no entrega ona plaka. Hanesan baibain, kuandu serimónia entrega plaka katak konstrusaun entrega fali ba eskola no entrega ba komunidade atu tau matan,” nia dehan.

Reprezentante Administradór Munisípiu Covalima, Francisco de Jesus Alves, hato’o agradesimentu ba VIII Governu Konstituisionál liuhosi Ministru Edukasaun Juventude no Desportu (MEJD) tanba ho situasaun defisil no tempu limitadu bele realiza programa di’ak iha parte edukasaun nian.

“Tuir informasaun ha’u hatene projetu hanesan ne’e kuaze implementa iha territóriu Timor. Iha munisípiu Covalima, iha projetu komunitária 15 ne’ebé implementa hosi ita-nia grupu komunitária ne’ebé implementa hosi kompaña Roman Junior,” nia hateten.

Ho nune’e, nia dehan, ohin mai hamutuk iha ne’e asiste Ministru Edukasaun Juventude no Desportu (MEJD) atu entrega plaka ba Servisu Edukasaun Munisípiu Covalima katak implementasaun projetu ne’e konklui ona.

Entrega plaka ne’e hanesan responsabilidade no fó esperansa ba futuru edukasaun munisípiu Covalima, tanba dala barak inan-aman, autoridade lokál sira hato’o ezijénsia atu hadi’a eskola no kompleta fasilidade eskola.

Entretantu, tuir dadus hosi edukasaun Covalima katak konstrusaun no reabilitasaun ba eskola 15 ne’e mak hanesan EBF Holbolu, Laen-Tolu, Maucola, Salasa, Usecai, Soidiga, Aitos, Macocon, Has-Ain, eskola Tékniku Vokasionál Akar-Laran, Eskola Sekundáriu Jerál Públiku Suai, EBC Zumalai, Fatumea, Traducama konstrui no rehailita eskola sala-de-aula kompleta ho eskritóriu, armajen no casa de banho (toilet).

Antes ne’e, iha 07 outubru 2022, Vise-Ministru Edukasaun Juventude no Desportu, António Guterres, asina kontratu ho grupu komunitária ne’ebé atu konstrui no reabilita eskola 15 iha munisípiu Covalima.

Orsamentu ba reabilitasaun no konstrusaun ba eskola 15 iha Covalima ne’e mai hosi orsamentu jerál estadu tinan 2021 ne’ebé prevee iha transferénsia públika hamutuk millaun $1,6, grande projetu orsamentu mai hosi rubrika Kapitál Dezenvolvimentu ne’ebé konstrui eskola Kafé haat (4).

Jornalista : Celestina Teles

Editór       : Cancio Ximenes