MANATUTO, 04 maiu 2023 (TATOLI)—Diretór Komisaun Nasionál Eleisaun (CNE) munisípiu Manatuto, Paulino Soares, kuarta ne’e, Partidu Demokrátiku (PD) kansela hala’o kampaña eleitorál iha postu administrativu Laleia, munisípiu Manatuto.
Notísia Relevante: PD kompromete sei dezenvolve agrikultura no turizmu iha Lautém
“Sira telefone ha’u iha kalan boot ba mudansa kampaña no sira la realiza tanba kestaun orsamentu. Nune’e, ohin, PD la realiza kampaña iha laleia,” nia hateten ba Agência Tatoli liuhosi telefónika.
Maibé, nia dehan, ohin dadeer sira hatama fali ona oráriu hodi husu iha fatin seluk nian.
“Oráriu ne’e, ami manda ona ba nasionál no hetan lai aprovasaun nia durasaun loron lima. Hotu tiha mak hetan fali data, oras no fatin atu realiza ne’ebé ami hein de’it hosi nasionál. Sura hahú ohin to’o loron lima,” nia hateten.
Entretantu, nia hateten, Sekretáriu Ezekutivu Partidu Demokrátiku (PD), Jacinto Barros Gusmão, hateten Partidu Demokrátiku kansela kampaña tanba asuntu família.
“Ohin dadeer ne’e, ami simu informasaun hosi Koordenadór Postu Administrativu Laleia nian katak lorokraik tuku 14h00 maibé depois meudia ami simu fali informasaun dehan kansela tanba Koordenadór nia família mate. Tanba ne’e, ami kansela tiha kampañia PD nian ohin,” nia dehan.
Jornalista : Osória Marques
Editór : Cancio Ximenes
