PDC hakarak promove juventude iha área arte no kultura
MANATUTO, 04 maiu 2023 (TATOLI)—Prezidente Partidu Democrata Cristão (PDC), Francisco de Araújo, hateten, PDC hakarak promove juventude iha área arte no kultura nune’e bele kompete festivál Internasionál.
Notísia Relevante: PDC hakarak hamosu ministériu kultura-relijiaun iha Timor-Leste
“Promove juventude sira iha área arte no kultura hodi kompete iha festivál Internasionál sira iha Dubai. PDC sei kria kondisaun ba setór produtivu sira hodi garante ekonómia sustentavél no asegura ai-han nutritivu sira hodi kompete iha merkadu internasional,” nia hateten iha konferénsia imprensa, kuarta ne’e.
Bainhira povu fó konfiansakaer ukun, nia hateten, sei halo kooperasaun multilaterál ho nasaun dezenvolvidu sira, hodi kria indústria no garante juventude dezempregu hodi servisu iha rai-li’ur no rai-laran.
PDC mós planu atu halo parseiru ho ONG Internasionál sira hodi kria kondisaun ba juventude hodi redúss númeru dezempregu iha Timor-Leste.
Nune’e, PDC hakarak sai belun ba nasaun hotu iha mundu, sei la buka atu kria inimigu ho nasaun ida iha mundu hanesan halo belun di’ak ho vatikanu nu’udar sentru fiar kristaun ba maiória timoroan sira.
Nune’e mós, nia dehan, halo belun di’ak ho Alemaña no Filipina hodi valoriza valór umanidade tuir ideolojia ‘Teolojia Libertasaun’ (Laodato Si no Fratelituty) mak oinsá kuidadu uma komun no valór uumanidade hodi garante boa-governasaun.
“Halo belun di’ak ho Arabia Saudita nu’udar sinál inkluzivu no solidaridade ba timoroan musulmanu sira. No, prepara kondisaun hotu, hanesan rekursu umanu, seguransa no sistema no teknolojia antes sai membru ba ASEAN iha tinan oin,” nia hateten.
Hosi ne’e, PDC sei promove diálogu no dame ba mundu, liu-liu ajuda nasaun sira-ne’ebé sei iha konflitu nia laran atu kria pás no establidade ba sira-nia povu.
“Promove timoroan sira-nia abilidade no koñesimentu ba nasaun sira seluk atu sai merkadu traballu ba timoroan sira no prepara kondisaun ba merkadu lokál hodi asegura produsaun produtivu sira atu prepara no sai membru ba ASEAN,” nia hateten.
Jornalista : Osória Marques
Editór : Cancio Ximenes
