LAUTÉM, 04 maiu 2023 (TATOLI)- Prezidente Partido os Verdes Timor ( PVT), António Lelahuno Cruz, hateten bainhira ka’er ukun, sei fasilita vistu serbisu ba joven iha Munisípiu Lautém hodi rezolve rasik povu Lautém nia problema sosiál.
Prezidente Partidu ne’e kompromete sei fó vistu serbisu ho durasaun tinan lima ba joven sira iha Lautém, hodi ba serbisu iha rai-li’ur hadi’a sira-nia moris.
“Ida ne’e sai nu’udar programa prioridade ba PVT. PVT kompromitidu uainhira kaer Governu, sei fasilita vistu servisu ba Joventude iha Munisípiu Lautém hodi ba serbisu iha nasaun 10 ne’ebé antes ne,e sai ona parseiru ba PVT mak hanesan Austrália, Nova Zelándia, Inglatera, Japaun, Korea Sul , Canada, Irlanda Norte, Scotlandia no Swedia,” Prezidente PVT hateten ba Militante no Simpatizante sira iha kampu futobol 28 Novembro Eis-kampaun 745, Poihoro, Lospalos, kinta ne’e.
Atonio Lelahuno haktuir, objetivu haruka joven sira ba li’ur, atu bele fila mai investe iha área oioin iha Timor-Leste nune’e bele diversifika ekonomia iha lautém.
“Kada tinan ita sei haruka juventude Lautém hamutuk 4.000 to’o 5.000 ba serbisu iha estranjeiru, nune’e sira bele hetan osan hodi mai investe fila fali iha área turizmu, pekuária, peskas, agrikultura no bele loke empregu ba ema seluk hodi diversifika ekonomia iha Munisípiu Lautém ba povu Lautém nia moris di’ak”.
Enkuantu iha parte seluk, Líder Os Verdes ne’e mós esklarese nia programa prioridade seluk maka hanesan aselera desentralizasaun poder lokál.
“Jestaun adminstrasaun no jestaun finanseira sei konsentra iha Dili no Administradór laiha poder hodi rezolve problema sosiál. Tanba ne’e karik povu hili PVT iha Eleisaun Parlamentár 21 maiu sei aselera densentralizasaun poder lokál hodi aloka orsamentu ne’ebé sufísiente ba Munisípiu Lautém hodi fó kbiit ba Autoridade Lokál sira, bele halo dezenvolvimentu iha munisípiu Lautém,” António Lelahuno garante.
Nia esplika katak denzenvolvimentu hakdasak tanba seidauk implementa desentralizasaun poder lokál iha Munisípiu Lautem.
“Implementasaun ba desentralizasaun poder lokál tenke aselera atu nune’e Munisípiu sira iha finansiamentu rasik hodi hadi’a setór infraestrutura hanesan estrada, ponte, saúde, edukasaun, irigasaun, turizmu, agrikultura no problema sosiál seluk iha Munisípiu,” nia dehan.
Jornalista : Camilio de Sousa
Editora : Nelia Borges
