AINARO, 04 Abríl 2023 (TATOLI) – Sekretariadu Tékniku Administrasaun Eleitorál (STAE) munisípiu Ainaro fó formasaun, loron rua, ba ofisiál eleitorál hamutuk 710 husi postu administrativu Ainaro Vila no Maubisse hodi apoiu ba prosesu eleisaun parlamentár.
Responsável Ekipa Formadora STAE Ainaro, Anarela Zeferino da Silva Barros, hateten formasaun ne’e destina ba ofisiál eleitorál sira husi postu administrativu Ainaro Vila no Maubisse ne’ebé mak sei servisu iha sentru no estasaun de votu sira iha eleisaun parlamentár.
“Formasaun ne’e ami aprezenta matéria sira kona-ba ofisiál eleitorál sira nia funsaun hodi asegura prosesu eleitorál iha kada sentru votasaun, oinsa halo kontajen no preenxe akta sira”, Anarela Barros informa ba Tatoli, iha Ainaro Vila.
STAE Ainaru registu ofisiál eleitorál hamutuk 1.150, husi númeru ne’e 310 husi postu administrativu Ainaro Vila no 400 husi Maubisse mak tuir ona formasaun.
Tuir oráriu, iha aban no bainrua formasaun hanesan sei fó mós ba ofisiál eleitorál sira husi postu Hato-Builico no Hatu-Udu.
Tuir dadus, STAE regjista sentru votasaun 90 no estasaun votu 115 iha Ainaro.
Notísia relevante: STAE Liquiça identifika suku haat susar asesu ba sentru votasaun iha loron ElPar
Jornalista: Afonso do Rosário
Editora: Isaura Lemos de Deus
