DILI, 04 maiu 2023 (TATOLI)–Polísia Nasionál Timor-Leste (PNTL), Unidade Patrullamentu Fronteira (UPF), iha loron 29 abríl 2023 halo atividade rutina iha sira-nia área serbisu, ne’ebé konsege detein timor-oan ida ho identidade L. M. M, halo viajen hosi munisípiu Bobonaro atu mai Dili.
“Iha pasa revista ida-ne’e, UPF konsege hetan osan rupiah ho montante 330 juta no hafoin hetan osan ne’e, Polísia sira husu ba ita-nia sidadaun ne’e kona-ba osan ne’e mai hosi ne’ebé no atu halo saida, maibé ita-nia sidadaun ne’e la konsege esplika ho di’ak, kona-ba motivu lori osan,” Xefe Departamentu Investigasaun Kriminál Nasionál PNTL, Superintendente Xefe Jorge Monteiro hateten liuhosi konferénsia imprensa, iha Kuartel Jerál PNTL, Caicoli, kinta ne’e.
Notísia relevante : PCIC detein timoroan ida lori osan falsu hosi Inglaterra
Nia dehan, iha loron 30 abríl, UPF entrega ona osan ho sidadaun ne’e ba iha Komandu PNTL munisípiu Bobonaro hodi halo prosesu identifikasaun.
“Prosesu identifikasaun ba iha kazu ne’e, Komandu munisípiu Bobonaro halo ona no kazu ne’e rejista ona iha Ministériu Públiku ho númeru NUC 0063 Bobonaro-Batugade. Tanba ne’e maka relasiona ho informasaun sira seluk, hanesan osan nia orijen mai hosi ne’ebé, no mós objetivu transportasaun hosi Bobonaro mai Dili ba interrese saida, sei iha prosesu investigasaun nia laran no labele transmite ba púliku, no konsidera segredu justisa,” nia esplika.
Xefe Departamentu Investigasaun ne’e adianta osan ne’ebé lori la’ós osan falsu maibé osan orjinál maibé rupiah.
Jornalista : Antónia Gusmão
Editora : Julia Chatarina
