CNE husu partidu polítika respeita kalendáriu kampaña eleitorál
MANATUTO, 05 maiu 2023 (TATOLI)—Diretór Komisaun Nasionál Eleisaun (CNE), munisípiu Manatuto, Paulino Soares, husu ba partidu polítika atu respeita regra no kalendáriu kampaña eleitorál, karik altera fatin no oras tenke informa ba Polísia Nasionál Timor-Leste (PNTL) no CNE nune’e labele hein iha fatin kampaña ne’ebé mamuk.
Notísia Relevante: PDC hakarak promove juventude iha área arte no kultura
“Seguransa ba kampaña eleitorál ne’e importante tebes hodi asegura pás no estabilidade no presiza iha supervizaun no observasaun hosi CNE no sosiedade sívil sira. Tanba ne’e, husu nafatin partidu polítiku sira ne’ebé halo kampañia atu respeita regra sira-ne’ebé iha. Karik, hakarak altera oras ka fatin tenke inform aba CNE no PNTL,” nia hateten ba Agência Tatoli liuhosi telefónika, sesta ne’e.
Nia dehan, momentu ne’e, CNE ho PNTL ba hein tiha suku Cribas maibé Partido Democrata Cristão (PDC) la mosu no ikus tuir informasaun katak realiza fali iha tasi ibun Manatuto.
“Ami ba hein kampaña partidu PDC nian ne’ebé tuir loloos hala’o loron 03 maiu iha Cribas no to’o ami fila la hetan sira. Maibé ami simu informasaun katak sira ba hala’o fali iha peskadór sira-nia fatin tasi ibun. Ida-ne’e mós ami la simu informasaun no nein fó hatene ami no Polísia sira mós,” nia dehan,
Tuir nia, ida-ne’e viola no laiha koñesimentu ba CNE ho PNTL, tanba ne’e CNE Manatuto nafatin ajusta iha relatóriu hodi subemte ba nasionál.
“Tuir ami-nia supervizaun katak ida-ne’e labele tanba tuir loloos ne’e ami hatene, Polísia hatene, inklui mídia sira mós tenke akompaña maibé ikus realiza no ami lahatene, nune’e ami prienxe iha relatóriu,” nia hateten
Nia dehan, bainhira partidu ida hakarak altera oras ka fatin tenke informa ba CNE no mós ba PNTL, nune’e bele hatene no asegura tabva se lae akontese buat ida bainhira mak PNTL bele to’o lalais hodi asegura.
Jornalista : Osória Marques
Editór : Cancio Ximenes
