VIQUEQUE, 05 maiu 2023 (TATOLI)-–Fundu Global apoia mákina MINXRAY atu detekta moras tuberkuloze nian ba Servisu Saúde munisípiu Viqueque.
“Ami entrega ekipamentu ba munisípiu Viqueque atu ekipa saúde sira uza halo deteksaun ba moras tuberkoloze. Ekipamentu ne’e iha Timor-Leste kuaze iha munisípiu 14 ho komponete kompletu, nune’e pesoál saúde sira la presiza lee teste hotu kona-ba rezultadu moras tuberkuloze iha ka lae tanba sei detekta rasik,” Administradór Divizaun Fundu Global, Noel Gaspar Pinto, hateten hafoin ramata entrega ekipamentu ba munisípiu Viqueque, iha salaun Administrasaun, sesta ne’e.
Notísia relevante : Kombate tuberkuloze, PM husu populasaun tenke partisipa rastreiu iha fasilidade saúde
Nune’e, pesoál saúde sira sei uza mákina raiu-x móvel ne’e ba vizita uma-kain liuhosi programa ‘saude na família’ hodi halo deteksaun no luta hapara moras tuberkuloze
Iha biban ne’e, nia husu ba Autoridade lokál halo advokasia ba abitante sira hodi hakbesik ba fasilidade saúde nune’e bele detekta abitante sira ne’ebé moras tuberkuloze tanba munisípiu Viqueque rasik deklara ona atu hapara moras ne’e iha tinan 2024.
Iha fatin hanesan, Administradór munisípiu Viqueque, Januário Soares ‘Bolly’, agradese ba Fundu Global tanba iha ona inisiativa di’ak.
“Ha’u agradese ba Fundu Global tanba oferese ona ekipamentu móvel, nune’e ita bele lori tama sai suku. Espera katak ekipamentu ne’e bele ajuda pesoál saúde sira detekta moras tuberkoloze atu nune’e ita bele kombate moras ne’e,” nia hato’o.
Nune’e mós, Diretór Servisu Saúde munisípiu Viqueque, Pedro da Silva Pereira, informa, parte saúde iha ona planu tama sai postu kada semana.”Ami otimista katak iha tinan 2024 munisípiu Viqueque bele hapara moras tuberkuloze. Nune’e sábadu aban ami hahú lori ekipametu raiu-x ba área Buanurak hodi fó teste ba komunidade,” nia dehan.
Jornalista : Vitorino Lopes da Costa
Editora : Julia Chatarina
