HEADLINE, SAÚDE

Kombate tuberkuloze, PM husu populasaun tenke partisipa rastreiu iha fasilidade saúde

Kombate tuberkuloze, PM husu populasaun tenke partisipa rastreiu iha fasilidade saúde

Primeiru-Ministru, Taur Matan Ruak. Imajen Tatoli/Francisco Sony

DILI, 05 agostu 2022 (TATOL)—Primeiru Ministru, Taur Matan Ruak, husu ba populasaun iha territóriu nasionál atu partisipa rastreiu ka screening teste iha fasilidiade saúde hodi kontribui ba kombate moras tuberkuloze iha Timor-Leste.

“Ha’u apela ba inan-aman sira no populasaun tomak katak daudaun ne’e, ita nia ekipamentu sufisiente atu halo teste no identifika moras tuberkuloze, nune’e husu populasaun hotu tenke kontribui  partisipa rastreiu kabeen tasak iha fasilidade saúde-sira atu hatene ita nia moras hodi prevene no kombate sedu iha ita nia-rain,” PM Taur hateten ba jornalista sira iha Bidau-Dili, sesta ne’e.

Xefe Governu hato’o asuntu ne’e bainhira partisipa inaugura laboratóriu Line Probe Assay no lansamentu ba karreta movél ba diagnóstiku moras tuberkuloze iha Laboratóriu Nasionál Saúde, Bidau-Dili.

Biban ne’e, PM Taur mós agradese ba parseiru Organizasaun Mundiál Saúde (OMS) ne’ebé apoia karreta klínika movél tubekoloze nian hodi halo dignóstiku ba pasiente moras  tuberkuloze iha komunidade sira.

“Ita agradese ba parseiru sira ne’ebé durante iha situasaun difisil ajuda ekipamentu médiku hodi halo dignosa ba moras sira hotu, maibé ohin loron apoia tan karreta klínika movél tuberkuloze hodi halo diagnostiku  ba moras TB sira iha komunidade nia le’et,”Xefe Governu agradese.

Tanba, moras tuberkuloze nafatin sai  problema ne’ebé afeta ba sosiedade, nune’e Governu nafatin halo esforsu hodi kombate ka elemina moras ne’e iha tinan 2025.

Nune’e, Líder Ezekutivu ne’e manifesta VIII Governu Konstitusionál nia apoia no solidariza Profisionál Saúde atu servisu maka’as ba elemina moras tuberkuloze iha Timor-Leste.

Iha fatin hanesan, Reprezentante Organizasaun Mundiál Saúde (OMS) iha Timor Leste, Arvind Mathur, hateten laboratóriu ne’e ajuda halo diagnóstika no deteta rezisténsia moras tuberkuloze hodi bele elemina iha Timor-Leste.

“Hau kontente atu hatudu katak Van TB movél ne’ebé lori ho apoia husi parseriu Fundu Globál iha teknolójia Estadu Arte – Mákina Rádiu dijitál ho Intelligence Artificial, no instrumentu diagnóstiku molekular foun ida (TrueNat) ne’ebé OMS aprova ona ba atividade detesaun kazu intensivu,” nia afirma.

Nia dehan, mákina hirak ne’e ajuda tebes atu halo screening moras tuberkoluze ba  populasaun oioin inklui ema ho risku aas no iha suku no aldeia sira iha Dili no munisípiu sira atu prevene sedu.

MS deteta pozitivu TB 1.300

Xefe programa Tuberkuloze Nasionál  Ministériu Saúde, Constantino Lopes, informa hosi janeiru to’o juñu , rejista suspeitu tuberkuloze hamutuk 2.000-resin, hosi númeru ne’e pozitivu tuberkuloze na’in-1.300 iha Timor laran tomak.

“Ita deteta suspeitu tuberkuloze hamutuk 2.000-resin, maibé pasiente sira ne’ebé ho kabeen tasak pozitivu hamutuk 1.300 iha fasilidade saúde sira iha munisípiu hotu,. Daudaun ne’e sira iha hela tratamentu nia laran,” nia relata.

Timor-Leste hamutuk ho estadu membru Organizasaun Mundiál Saúde (OMS) nian, partikularmente SEAR, iha kompromisu boot atu hakotu TB nu’udar prioridade polítika globál ne’ebé hato’o iha primeira reuniaun altu nível ONU nian iha setembru 2018. Tinan tolu hafoin kompromisu ida-ne’e atu hakotu TB.

Ba Timor-Leste, notifikasaun kazu TB redús ba 20 to’o 25% no atividade ba divulgasaun espesifikamente relasiona ho aumentu ba deskoberta kazu sira, tratamentu preventivu no apoiu psikososiál hetan interrupasaun.

Tuir estimasaun katak, kobertura ba tratamentu ne’ebé atinje ona 63% iha 2019, iha 2020 tuun fali ba 48%. Kobertura ba tratamentu preventivu ba TB durante períodu ida-ne’e mós reduz no proporsaun ba kazu TB multi-rezistente iha inísiu tatramentu mós tuun.

Nesesidade ida atu haforsa kompromisu husi setór sira hotu atu envolve efetivu liután ho programa nasionál TB hodi hapara TB ne’ebé pertinente tebes atu iha “Planu Nasionál ba Asaun Aseleradu hodi Hapara TB: 2021-2025” ho orienta ba asaun sira atu kobre lakuna iha prevensaun no kuidadu.

OMS apoia karreta ida no motór 15

Biban ne’e, Organizasaun Mundiál Saúde iha Timor-Leste apoia karreta multi funsaun ida no motorizada 15 ba Laboratóriu Nasionál Saúde hodi  fasilita  servisu vizilánsia COVID-19  no Tuberkuloze inklui moras sira seluk iha territóriu nasionál.

“Ami entrega karreta multi funsaun ida hodi hametin eskritóriu ba funsaun fiskalizasaun no motór 15 ba Departamentu Vizilánsia sira atu uza hodi hala’o servisu vizilánsia nian iha Timór Leste,” Reprezentante OMS iha Timor-Leste, Arvind Mathur hatutan.

Enkuantu, Diretora Laboratóriu Nasionál Saúde, Endang Soares, agradese ba Organizasaun Mudiál Saúde ne’ebé apoia karreta ida no motór 15 tanba fasilita tebes serbisu laboratóriu nian.

“Karreta no motorizada ne’e apoia tebes ita atu halo vizilánsia ativu ba COVID-19 liuliu halo screening no kontak- resin ba iha moras COVID-19,” nia afirma.

Jornalista : Felicidade Ximenes

Editór       : Florencio Miranda Ximenes

iklan
iklan

Leave a Reply

iklan
error: Content is protected !!