PD kompromete sei indústrializa agrikultura loke kampu traballu ba joven sira

COVALIMA, 06 maiu 2023 (TATOLI)–Prezidente Konsellu Polítika Nasionál (CPN, sigla portuges) Partidu Demokrátiku (PD), Adriano do Nascimento, kompromete bainhira povu fó fiar ba Partidu Demokráriku (PD) iha eleisaun parlamentár ne’e mak PD sei loke indústria ikan no indústrializa agrikultura hodi loke kampu traballu ba joven sira.

Notísia Relevante: PD promete sei hamenus taxa nesesidade bázika 

“Parte súl, ita-nia polítika indústrializa setór agrikultur nune’e hodi halo rekrutamentu ba timoroan sira-ne’ebé iha kuñesimentu, kona-ba agrikultura hodi harii indústria agrikultura  nune’e bele loke kampu traballu. Ita mós sei harii indústria ikan nian, tanba ita-nia ema kaer ikan, nune’e bele loke oportunidade servisu,” Adriano do Nascimento hato’o promesa ne’e, iha kampaña eleitorál ho tipu komísiu iha Kampu Ladi, Camanasa, sábadu ne’e.

Aleinde loke indústria ikan, nia dehan, bazeia ba estudu ne’e rai Covalima mós iha mina, osan-mean hanesan fatuk barak iha suku Taroman iha valór ekonómiku maibé to’o ohin loron seidauk dezenvolve, nune’e bainhira povu fó fiar ba PD mak sei dezenvolve rekursu naturál.

Nia dehan, programa seluk mak dezenvolvimentu instituitionál hanesan aliserse programa prioridade no planu asaun ba governasaun oin mai, tanba líder polítiku sira durante tinan 20 hatun no diskrimina malu, nune’e instabilidade polítiku la fó esperansa.

Partidu polítika ho numeru sorteiu haat (4) ne’e, bainhira povu fó fiar ne’e PD hakarak hametin órgaun soberanu sira hanesan Prezidénsia Repúblika, Parlamentu Nasionál (PN), Governu no Tribunál Rekursu (TR) hodi hametin relasaun instituisionál.

“Ita-nia programa priodade, ita sei promove diálogu, konsensializasaun, ita halibur ita-nia aman sira, pilár dezenvolvimentu ekonómia ba nasaun,” nia hateten.

Razaun, nia hateten, dezenvolvimentu ekonómia ba nasaun tanba laiha kampu traballu, seidauk esplora riku soin tanba iha pilar dezenvolvimentu ekonómia ne’e PD sei halo akordu ho nasaun Austrália liu-liu kompañia mina no gás hodi dezenvolve greater sunrise no projetu tasi mane.

Ida-ne’e, tuir nia, dezenvolvimentu sosiál no kulturál tanba seidauk dignifika nu’udar Timor nia nain ema barak seidauk servisu polítika atu forma ema sai ema, nune’e tenke atensaun mós oinsá atu dezenvolve edukasaun liuhosi fó kreditu ba estudante sira, bolsa estudu no dezenvolvimentu infraestrutura.

Koordenadór Partidu Demokrátiku munisípiu Covalima, Julio do Carmo, husu estrutura atu servisu makaas nune’e bele lori vitória ba partidu iha eleisaun parlamentár.

Atividade kampania PD iha Covalima partisipa másimu hosi militante sira, observa hosi observadór nasionál no internasionál, hetan seguransa hosi PNTL no observa mós hosi CNE no PDHJ.

Jornalista : Celestina Teles

Editór        : Cancio Ximenes