ERMERA, 05 maiu 2023 (TATOLI) – Partidu Demokrátiku (PD) kompromete sei fó subsídiu $150 ba reabilitasaun kafé kada ektare fulan-fulan.
“Ohin loron kafé iha Hatulia-Fatubesi mamuk ona. Ita labele koli’a tan kafé iha Hatulia tanba rai mamuk ona. Buat ne’ebé ita sei halo mak reflorestasaun no reabilitasaun ba kafé. Entaun, PD nia programa mak ne’e ita orienta kafekultór sira tesi kafé kada ektare sei simu $150 kada fulan to’o tinan tolu. Ita sei asina akordu ida atu nune’e bainhira to’o tinan tolu kafé fuan ona, entrega fali ba kafekultór seluk,” Sekretáriu Jerál PD Munisípiu Ermera, Domingos Mariano Reis hato’o kompromisiu eleitorál ne’e iha kampaña dialógu komunitária, iha Aldeia Poerema, Suku Fatubolu, Postu administrativu Hatulia B, Munisípiu Ermera, sesta ne’e.
Domingos dehan, atu halo reabilitasaun ba kafé tuan sira mak PD nia programa mak sei fahe kadó hodi halo reabilitasaun ba kafé tuan sira hodi hasa’e produsaun kafé.
“Ita sei koloka lisensiatura agrikultura nain rua ba kada suku iha Ermera laran tomak hodi hanorin no fó formasaun ba kafekultór sira, oinsá prepara kafé oan, oinsá kuda kafé ho distánsia ne’ebé loos, no oinsá kuidadu kafé hodi bele fó fuan iha tinan tolu nia laran. Entaun ita sei rekruta lisensiatura agrikultura sira hodi koloka ba iha suku ida-idak,” Domingos promote.
Nia dehan, atu hadi’a kulidade kafé, PD mós sei fahe mákina dulas kafé modernu ba grupu kafekultór sira hodi dulas kafé kulit tasak.
Iha kampaña ne’e PD mós hato’o kompromisiu polítika atu desida no define folin kafé hodi prevene manipulasaun ba folin kafé.
“PD sei deside presu nasionál kafé, atu nune’e NCBA, Timor Global, no Elsa Café labele halo manipulasaun ba folin kafé. Ita sei define kafé nia folin ba katégoria klase A, B no C. Ida ne’e sei motiva kafekultór sira atu kuda no kuidadu kafé,” Domingos esplika.
Hodi hasa’e rekursu umanu iha dezenvolvimentu plantasaun kafé, Sekretáriu Jerál ne’e hato’o mós katak bainhira PD kaer ukun, sei loke Universidade Kafé iha Postu administrativu Hatulia B.
“Bainhira ita kaer ukun, ita sei harii universidade ida ho naran ‘Universidade Kafé’ iha Postu administrativu Hatulia B. Ema ne’ebé mak atu eskola iha Universidade ida ne’e mak Hatulia oan, Ermera oan no munisípiu seluk. Ida ne’e sei prepara ita-nia jerasaun foun sira atu dezenvolve ita-nia kafé. Selae, aban bainrua kafé bele lakon,” Lider ne’e dehan
Jornalista: Filomeno Martins
Editora: Nelia Borges
