Servisu Saúde Viqueque rejista moras tuberkuloze 34 iha trimestre dahuluk
VIQUEQUE, 06 maiu 2023 (TATOLI)—Servisu Saúde Viqueque rejista pasiente pozitivu moras tuberkuloze hamutuk na’in-34 iha trimestre dahuluk tinan ne’e, ne’ebé daudaun pesoál saúde sira fó hela tratamentu.
“Ita-nia alvu bele detekta moras tuberkuloze hamutuk 35 iha munisípiu Viqueque iha trimestre dahuluk ne’e. Nune’e, pesoál saúde sira hosi postu lima halo esforsu no konsege foti pasiente sira-nia mear tasak hodi halo screaning no ikus mai rejista kazu tuberkuloze konfirmadu pozitivu hamutuk na’in-34, ne’ebé atinje 97% hosi ita-nia alvu. Pesoál saúde sira daudaun halo hela tratamentu ba pasiente tuberkuloze sira,” Diretór Servisu Saúde munisípiu Viqueque, Pedro da Silva Pereira, informa ba Agência Tatoli, iha postu Viqueque Villa, sábadu ne’e.
Notísia relevante : Fundu Global apoia mákina deteta moras tuberkuloze ba Viqueque
Hosi moras tuberkuloze 34 rejistadu ihai sentru saúde haat, kompostu hosi sentru saúde Uatucarbau iha na’in-rua, sentru saúde Uatulari iha na’in-lima, sentru saúde Ossu iha na’in-12 no sentru saúde Viqueque Villa iha na’in-15, enkuantu sentru saúde Lacluta la rejista.
Nune’e, ba oin Servisu Saúde Viqueque sei kontinua halo detekta ba moras tuberkuloze.
“Daudaun iha munisípiu ne’e, ita-nia kobertura detekta kazu tuberkuloze ne’e boot tebes tanba ami hakarak hapara transmisaun moras tuberkuloze iha munisípiu Viqueque,” nia akresenta.
Progresu no atinjimentu kazu moras tuberkoloze iha munisípiu Viqueque, iha tinan 2021 alvu annuál hamutuk 138, konsege detekta pozitivu 104 (74%), iha tinan 2022 ita iha alvu 140, konsege detekta pozitivu 150 (107%), nune’e iha tinan-rua nia laran detekta ema na’in-278 mak hetan moras tuberkuloze, ne’ebé daudaun pesoál saúde sira halo tratamentu.
Jornalista : Vitorino Lopes da Costa
Editora : Julia Chatarina
