PLP kompromete sei implementa programa fó benefísiu direta ba joven sira
MANATUTO, 07 maiu 2023 (TATOLI)—Partidu Libertasaun Popular (PLP) ho númeru sorteiu tolu (3), domingu ne’e, hala’o kampaña eleitorál ho tipu diálogu hodi hato’o PLP nia kompromisiu polítika atu implementa programa 10 ne’ebé sei fó benefísiu direta ba joven sira.
Notísia Relevante: PLP hakarak sai riin ba povu no nasaun
Vise Prezidente Partidu Libertasaun Popular (PLP), Maria Angelina Sarmento, hateten iha 21 maiu 2023 mak povu fó fiar, PLP sei implementa nia programa 10 ne’ebé benefísiu ba joven sira iha Timor-Leste.
“Programa prioridade 10 ne’e sei fó vantajen ba ita-nia joven sira,” nia hateten iha kampaña ho tipu diálogu, iha postu administrativu Soibada, munisípiu Manatuto.
Programa hirak ne’e, nia hateten, PLP sei tau matan ba veteranu 0-3 no 4-7 sira tanba sira simu dala ida de’it subsídiu hosi Estadu no kada fulan sira la hetan buat ida.
Aleinde ne’e, programa ida tan mak PLP hakarak redús ki’ak iha multi dimensionál no redús má nutrisaun no mós inseguransa ba aihan.
La’ós ida-ne’e de’it, maibé iha mós programa ne’ebé asegura kresimentu ekonómiku anuál ida aas no aumenta nível produtividade nasionál no redús dependénsia esterna nian iha Timor-Leste.
Nia hateten, programa seluk tan mak aumenta empregu ba joven sira, aumenta reseita doméstika, mellória liután dezenvolvimentu umanu no sosiál iha Timor-Leste.
Nune’e mós, atu aumenta transparánsia no responsabilidade hodi halakon korrupsaun no promove pás, estabilidade, integra rejionál no Internasionál.
Tanba ne’e, nia husu ba povu Manatuto oan atu fó vitória ba PLP hodi implementa tanba iha semana ne’e, estrada hosi Mota Sahen ba to’o Suku Manufahi sei aprova.
Entretantu programa prioridade PLP ne’ebé durante ne’e hato’o nu’udar kompromisu iha atividade kampaña eleitorál ne’e hamutuk 10 mak hanesan:
- Sosiál;
- Edukasaun;
- Kria Fundu $1 billaun ba Setór Produtivu ho funan 0% to’o 3%;
- Turizmu, transporte no telekomunikasaun;
- Kria Fundu Rotativu ba moradó/komunidade tradisionál, jovens, artista, pintór, feto, desportu, kada suku $30,000 ba fulan neen (6) to’o tinan ida (1).
- Ambiente;
- Espanda projetu komunitáriu ba aselera dezenvolvimentu rurál liu-liu estrada, dada bee-moos, eletrisidade, eskola, klínika, Uma Naroman ba Povu, nsst;
- Halo Ordenamentu Territóriu no Rekualifikasaun Sidade Dili;
- Efisiénsia, efikasia no sustentabilidade iha Governasaun foun;
- Investe no Moderniza sistema servisu Saúde no redús pasiente ba rai-li’ur.
Jornalista : Osória Marques
EDitór : Cancio Ximenes
