MANUFAHI, 08 maiu 2023 (TATOLI) – Administradór Munisípiu Manufahi Arantes Isaac Sarmento husu ba Funsionáriu Públiku (FP) hotu iha Manufahi atu hasa’e Bandeira nasionál iha uma-oin hodi selebra loron restaurasaun independénsia 20 maiu ne’ebé sei akontese semana rua mai ne’e.
“Komemorasaun loron 20 maiu restaurasaun independénsia ida ne’e, Administrasaun Munisípiu Manufahi hasai ona sirkulár ida ba ema hotu atu dada bandeira RDTL iha kada uma kain ida-idak nian uma oin, tuir ha’u nia observasaun haree maioria Funsionáriu Públiku barak mak la hasa’e bandeira iha uma-oin, maibé hasa’e fali bandeira partidu polítiku nian, la’os bandu atu labele hasa’e bandeira partidu maibé tenke hasa’e mós bandeira RDTL hodi komemora ita-nia loron nasionál ne’e”, Arantes dehan iha isar bandeira ba semana da-uluk fulan maiu nian iha administrasaun munisípiu, segunda ne’e.
Nia dehan, ema hotu iha direitu atu envolve iha partidu polítiku, tantu FP no sidadaun baibain, maibé tenke hasa’e mós bandeira RDTL iha uma-oin atu festeza loron importante ne’e.
“Ha’u haree komunidade baibain sira mak hasa’e bandeira RDTL iha uma-oin maibé Funsionáriu Públiku sira nia uma oin hasa’e de’it bandeira partidu mak aas los, ne’e labele tenke hasa’e mós bandeira RDTL, funsionáriu ne’e tenke hatudu nia profisionál bele hasa’e bandeira partidu maibé tenke hasa’e mós bandeira RDTL”, nia dehan.
Nia hatutan, lei la bandu FP sira involve iha partidu politiku maibé tenke hatudu aan hanesan professional hanesan ema servidór ba estadu atu servi ba povu no nasaun.
“Funsionáriu Públiku sira se komunidade sir abele hasa’e bandeira RDTL nusa imi labele, povu ida la simu osan kada fulan nia sei hola bandeira ba hasa’e nusa ita ida kada fulan simu osan la hola bandeira ba has’e,” nia relata.
Tanba ne’e, nia apela nafatin ba FP hotu atu halo tuir sirkulár ne’ebé fó sai ona iha fulan kotuk atu hase’e bandeira RDTL iha uma oin hodi festeza loron restaurasaun ne’ebé sei akontese semana rua mai ne’e.
Jornalista: Hortencio Sanchez
Editór : Zezito Silva
