CNE Manatuto identifika militante FRETILIN konsumu alkol iha tempu kampaña
MANATUTO, 08 maiu 2023 (TATOLI)—Diretór Komisaun Nasionál Eleisaun (CNE) munisípiu Manatuto, Paulino Soares, hateten CNE Manatuto identifika militante FRETILIN balun konsumu alkol iha atividade kampañia eleitorál iha área Mantane, postu administrativu Laclo, munisípiu Manatuto.
Notísia Relevante: Iha Oé-Cusse, FRETILIN hakarak investe iha setór edukasaun no saúde
“Iha sábadu ne’e, ami akompaña kampaña iha fatin rua, salaun Paróquia Laclo nian mak Partidu Libertasaun Populár no Partidu FRETILIN iha Mantane nian iha Postu Laclo. Maibé iha kampañia PLP buat hotu la’o di’ak no laiha liafuan insulta malu maibé FRETILIN nian mak ami identifika militante na’in-tolu hemu tua iha tempu kampaña. Ida-ne’e ami anota no tenke tau iha relatóriu, tanba iha ámbitu kampaña CNE bandu militante konsumu tua no lanu,” nia hateten ba Agência Tatoli liuhosi telefónika, segunda ne’e.
Bainhira prosesu kampañia la’o, nia dehan, laiha militante ka ema ka grupu konsumu alkol tanba ne’e lei bandu.
“Militante na’in-tolu ne’e bainhira CNE hasee sira la rona no nafatin hemu mak CNE informa fali ba Polísia Nasionál Timor-Leste hodi ba fakar tiha tua. Tanba, iha oin reprezentante partidu polítiku ko’alia iha oin no sira hemu hela iha kotuk, ne’e labele,” nia hateten.
Hahalok ida-ne’e, nia hateten, kontra regra kampaña nian entaun CNE Manatuto sei prienxe ba relatóriu ne’ebé prepara hele no sei haruka ba CNE nasionál.
Jornalista : Osória Marques
Editór : Cancio Ximenes
