OÉ-CUSSE 08 maiu 2023 (TATOLI) – Komisaun Nasionál Eleisaun (CNE, sigla portugés), rejista kazu rua durante kampaña eleitorál iha Rejiaun Administrativa Espesiál Oé-Cusse Ambeno (RAEOA).
Notísia relevante: CNE Oé-Cusse ensera edukasaun sívika no husu kontribui pás-estabilidade
Diretór CNE Oé-Cusse, Tomás Oqui Meta, informa, kampaña ba eleisaun parlamentár, hahú loron 19 abríl, abertura hosi partidu PUDD iha Oé-Cusse, no antes ne’e mós iha ona konsolidasaun rejionál, maibé situasaun ein-jeralmente la’o di’ak tanba laiha violénsia ruma mak akontese iha Oé-Cusse.
“Maibé iha krime eleitorál akontese iha mini kampaña ninian, hanesan militante partidu ida ba hatún militante partidu ida nia bandeira, ne’e mós tama krime eleitorál, iha mós difamasaun, iha partidu balu mai hato’o ona keixa, katak iha atividade kampaña balu, sira la hato’o programa maibé halo difamasaun, tanba sira la satisfaz ne’e mak sira mai hato’o ona keixa iha CNE,” Tomás Oqui Meta, informa ba jornalista sira iha edifísiu CNE Oé-Cusse, segunda ne’e.
“To’o agora ami simu ona keixa hamutuk rua, ida kona-bá hatún bandeira laiha koñesimentu hosi uma na’in, daruak maka difamasaun, keixa rua ne’e ami sei manda hotu ba nasionál, parte jurídiku CNE bele haree, asuntu ida-ne’e,” nia afirma.
Iha biban ne’e, Diretór CNE Oé-Cusse, informa, iha partidu polítiku hitu mak hala’o ona kampaña eleitor’al iha Oé-Cusse, partisipasaun hosi labarik, kontinua aumenta, tanba mai ho inan-aman.
Nia husu ba inan-aman atu iha konsiénsia moral, hodi enkoraja oan sira labele partisipa iha kampaña eleiorál tuir mai.
“Iha lei la autoriza labarik-sira, atu partisipa iha kampña, durante ne’e ami observa katak, iha labarik barak mak partisipa, iha atividade kampaña, maibé susar tebes ba CNE atubele haketak labarik sira hosi nia inan-aman,” nia katak.
Tuir nia, partisipasaun labarik iha kampaña, la’ós mai mesak maibé mai ho inan-aman, tán ne’e maka CNE difisil atu atubele hafahe labarik sira iha kampaña.
“Maibé ami nafatin husu ba inan-aman sira, atu iha konsiénsia, labele mobiliza labarik sira, atubele partisipa iha kampaña eleitorál, tanba ami observa iha partidu hitu tama ona iha Oé-Cusse, kuaze hanesan, partisipasaun labarik iha hotu, maibé ne’e la’ós partidu mak mobiliza maibé hosi inan-aman sira mak lori oan iha kampaña,” nia informa.
Alende ne’e mós hosi partidu loke múzika ho lian boot, ida-ne’e fasil atu konvida labarik sira atu partisipa iha kampaña, sein autoriza hosi partidu ida, maibé sira rasik mak partisipa, entaun inan-aman mak tenke enkoraja oan sira, tanba nia impaktu ba labrik ne’e iha.
“Hanesan inan-aman, ha’u hanoin tenke iha responsável morál, atu haree labarik nia futuru, tanba labarik partisipa iha kampaña mós bele fó aspetu negativu ba labarik, tanba bele estraga labarik nia futuru tanba influénsia linguajen ne’ebé hasai iha palku polítiku iha kampaña nian, tan ne’e ami husu liu-liu inan-aman atu labele lori labarik partisipa iha kampaña,” nia fó hanoin.
Entretantu, partidu hitu hala’o ona kampaña iha Oé-Cusse, mai hosi partidu PUDD, FRETILIN, KHUNTO, PDN, PDC, PD no partidu UDT.
Notísia relevante: CNE observa labarik barak partisipa kampaña PUDD iha Oé-Cusse
Jornalista : Abílio Elo Nini
Editór : Evaristo Soares Martins
