DILI, 08 maiu 2023 (TATOLI)–Bee Timor-Leste, Empreza Públika (BTL, E.P), segunda ne’e, kontrata empreza lokál, Marlvi Unipesoál, Lda hodi halo melloramentu ba sistema fornesimentu bee-moos iha kapitál postu administrativu Letefoho, munisípiu Ermera hodi benefisia abitante iha suku tolu.
“Ita espera hafoin asina kontratu ne’e sira bele mobiliza ona ekipamentu no tékniku sira hodi halo serbisu lalais iha terrenu ho durasaun fulan-neen resin. Espera bele ramata tuir tempu ne’ebé ita konkorda ona,” Carlos Peloi dos Reis, hateten iha salaun BTL, E.P, Caicoli.
Nia ne’e husu ba autoridade no komunidade lokál sira, bainhira BTL, E.P akompaña empreza iha terrenu presiza halo kooperasaun di’ak.
“Orsamentu ba projetu hamutuk $835.054,69. Kustu ba projetu boot tanba melloramentu ba sistema bee-moos ne’e ho distánsia kuaze kilómetru 18 no sei benefisia populasaun 5.000 resin hosi uma-kain besik 900,” nia akresenta.
Notísia relevante : BTL, E.P kontrata empreza rua distribui bee-moos ba komunidade Laclubar
Iha fatin hanesan, Xefe suku Docurai, postu administrativu Letefoho, munisípiu Ermera, Rafael Soares Maia, hateten, nu’udar autoridade lokál nia parte agradese ba BTL, E.P tanba bele halo aprovasaun ba empreza lokál hodi halo melloramentu sistema bee-moos iha Letefoho.
“Durante tinan barak, ha’u-nia komunidade halerik ba bee-moos maibé ho empreza manán na’in ne’ebé iha, ha’u fiar katak iha tempu badak ha’u-nia komunidade bele asesu ona bee-moos,” Autoridade suku otimista.
Nia dehan, bee-matan ne’ebé empreza sei dada ne’e hosi suku Katraik Kraik, ne’ebé ninia kanalizasaun hosi suku Dukurai mai to’o suku Haufu ne’ebé mak sei kobre ba postu administrativu Letefoho.
Iha biban hanesan, Diretór empreza Marlvi Unipessoál, Lda, Delio dos Santos Martins, kompromete sei halo serbisu tuir kontratu.
“Ohin asina ona kontratu, aban tékniku sira sei hola sasán. Ami garante sei hola sasán ho kualidade hodi halo serbisu iha terrenu hodi fornese bee-moos ba ita-nia komunidade,” nia tenik.
Suku tolu ne’ebé sai benefisiáriu ba bee-moos ne’e mak hanesan suku Katraik Kraik, Dukurai no Haufu.
Jornalista : Arminda Fonseca
Editora : Julia Chatarina
