DILI, 26 abríl 2023 (TATOLI)—Bee Timor-Leste, Empreza Públika (BTL, E.P), kuarta ne’e, kontrata tan empreza rua hodi fornese bee-moos ba komunidade iha postu administrativu Laclubar, munisípiu Manatuto.
Empreza rua ne’ebé asina kontratu ho BTL, E.P mak hanesan Adjudikatária Celijo Star Unipessoal Lda sei halo konstrusaun sistema bee-moos ho orsamentu ba projetu $468.906,58 ho durasaun serbisu fulan-neen, enkuantu Adjudikatária Twins 2 Unipessoal, Lda sei halo fornesimentu no instalasaun prefabricated liner tank ho orsamentu ba projetu $188.035,32 ho durasaun fulan-haat.
“Ita ohin asina kontratu tan ho empreza rua hodi halo kanalizasaun bee-moos no halo instalasaun ba tanke rezervatóriu sira iha kapitál postu administrativu Laclubar hodi tau bee-moos distribui ba komunidade iha Laclubar,” Prezidente Konsellu Administrasaun Carlos Peloi dos Reis, informa iha salaun BTL,E.P Caicoli, kuarta ne’e.
Notísia relevante : BTL,E.P kontrata kompañia fornese bee-moos ba komunidade Baguia no Quelicai
Empreza estatál ne’e promove ona kapitál postu administrativu 31 hosi 48 iha kapitál munisípiu.
“Ita hela de’it kapitál postu administrativu 17 mak sei promove projetu bee-moos ne’e tanba tékniku sira agora halo hela preprasaun maibé ita fiar katak tinan-ida ne’e ramata ita sei promove hotu mak ita kontinua fali ba bee rurál sira,” Carlos hateten.
Iha fatin hanesan, Na’in ba empreza Adjudikatária Twins 2 Unipessoal, Lda, Agostinha Mendonça, komprometidu sei garante serbisu iha terrenu tuir regulamentu ne’ebé iha.
“Ami-nia parte seidauk tun terrenu maibé garante sei serbisu tuir termu ne’ebé iha, nune’e bele fornese bee-moos ba komunidade,” nia dehan.
Nune’e mós, Administradór postu administrativu Laclubar, munisípiu Manatuto, Francisco Soares, agradese tanba BTL, E.P tanba asina ona akordu ho empreza sira.
“Ida-ne’e di’ak tebes tanba sei apoiu bee-moos ba komunidade. Desde ita ukun-an mai komunidade Laclubar asesu bee-moos liuhosi bee matan sira de’it maibé atu apoiu hosi Governu ne’e seidauk, nune’e asina akordu ohin ne’e di’ak tanba ba oin sei bele fornese bee-moos ba komunidade,” nia tenik.
Jornalista : Arminda Fonseca
Editora : Julia Chatarina
