Estrutura PDC iha Ataúro-Manatuto-Lautém seidauk estabelese
MANATUTO, 08 maiu 2023 (TATOLI)—Partido Democrata Cristão (PDC), Francisco de Araújo, hateten to’o agora estrutura Partido Democrata Cristão (PDC) iha munisípiu Ataúro, Manatuto no Lautém mak seidauk estabelese tanba kestaun tempu.
Notísia Relevante: PDC hakarak hamosu ministériu kultura-relijiaun iha Timor-Leste
“Ha’u mós foin s’ae ba Prezidente PDC iha fulan-janeiru ne’e no iha fevereiru mak ami hahú estabelese iha Dili, Baucau, Viqueque, Covalima, Bobonaro, RAEOA, Aileu, Ainaro, Manufahi, Liquiça, Ermera no seidauk mak Ataúro, Manatuto no Lautém,” nia hateten ba Agência Tatoli liuhosi telefónika, segunda ne’e.
Nia hateten, hafoin estabelese estrutura hirak ne’e mak PDC nia estrutura hahú halo edukasaun votante ba militante no simpatizante sira.
“Tanba edukasaun votante importante tebes ba ita-nia militante no simpatizante sira, einjerál povu Timor-Leste/ Tanba, liuhosi edukasaun votante mak sira bele vota ho loloos no razoavél,” nia hateten.
Edukasaun votante ne’e, tuir nia, PDC halo liuhosi fahe brosura ka buletin votu ne’ebé prepara ona no esplika ba sira oinsá bele hili no eserse sira-nia direitu votu.
“Durante kampañia ne’e, ami halo mós edukasaun votante ba ita-nia militante sira, liuliu bainhira halo dor to dor iha munisípiu ka postu inklui suku sira,” nia dehan.
Maske estrutura seidauk kompletu maibé sira nafatin iha vontade no esforsu oinsá bele hetan vitória iha eleisaun parlamentár ne’e, nune’e bele implementa programa prioridade PDC nian iha governasaun tuir mai iha períodu 2023-2028.
Planu no programa Partido Democrata Cristão (PDC) nian mak hanesan;
- PDC sei defende desentralizaun poder no polítika ba munisípiu no postu atu foti desizaun bazeia ba moto fiar malu hamutuk la’o ba oin.
- Guvernu sentrál sei aloka orsamentu no matadalan polítika, administrasaun no ezekusaun nian ba sira atu tuir maibé desizaun iha sira ninia liman atu halais prosesu dezenvolvimentu ida equitavel no inkluzivu.
- PDC sei nakfilak orsamentu insentivu ba xefe suku no xefe aldeia ba saláriu mensál inklui simu treseira idade nian.
- PDC sei aumenta mós insentivu désimu terseiru ba idozu no veteranu sira no mós dezeñu atividade rekreativa ba sira iha suku no aldeia.
- PDC sei hasa’e saláriu funsionáriu públiku no halo reveizaun ba saláriu polítiku no Asesór sira nian atu kria sosiedade ida ekilibru no inkluzivu.
- Hamosu Ministériu Kultura no Relijiaun atu tau matan ba kultura no relijiaun sira.
- Hamosu Ministériu Dezenvolvimentu Setór Privadu, nune’e tau matan ba kriasaun setór privadu no dezenvolvimentu ekonómia.
Jornalista : Osória Marques
Editór : Cancio Ximenes
