AINARO, 08 Maiu 2023 (TATOLI) – Governu liuhusi Ministériu Edukasaun, Juventude no Desportu (MEJD) hamutuk ho Embaixadór Japaun iha Timor-Leste inaugura Eskola Bázika Filiál (EBF) Builico, iha suku Ainaro, postu administrativu Ainaro Vila, munisípiu Ainaro.
Ministru Edukasaun, Juventude no Desportu, Armindo Maia, agradese ba Governu Japaun ne’ebé fó apoiu ba Ezekutivu Timor-Leste, liuliu MEJD hodi konstrui no reabilita eskola sira iha teritóriu nasionál.
Tuir governante ne’e, Governu tau prioridade bo’ot ba dezenvolvimentu edukasaun iha país ne’e, liliu iha nível infraestrutura edukativa oinsá atu harii no reabilita eskola sira, tanba barak mak iha kondisaun la di’ak.
Armindo Maia akresenta katak minitériu inaugura ona eskola liu ona 150 no sala de aula besik 1.200 iha territóriu nasionál no sei iha eskola liu 30 mak seidauk inaugura, tanba balu sei iha hela prosesu konstrusaun no reabilitasaun.
Iha Fatin hanesan Embaixadór Japaun, Tetsuya Kimura, iha nia intervensaun hateten, nia sente kontente, tanba bele halo vizita ba suku Ainaro hodi partisipa iha serimónia entrega edifísiu eskola Builico ba komunidade, manorin no estudante sira.
Diplomata ne’e apresia ba esforsu no kooperasaun husi Organizasaun Naun-Governamentál (ONG) lokál, Fundasaun Feto Hadomi Família (FFHF) ho komunidade sira hodi implementa projetu ne’e iha 2020 no finaliza ona konstrusaun ne’e iha 2021, maibé serimónia inaugurasaun ne’e atraza, tanba pandemia kovid-19.
“Projetu ne’e implementa liuhusi ami nia programa asisténsia ida ho naran Fundu Assisténsia ba Projetu Komunitáriu no Seguransa Humana (GGP, sigla iha inglês). Ida ne’e ho objetivu atu responde ba nesesidade bázika umana nian iha nível baze hanesan edukasaun, bee mos no saúde”, hateten embaixadór.
Maioria projetu GGP implementa husi parseiru lokál sira desde tinan 2000, Governu Japaun finansia ona projetu GGP hamutuk 136 iha teritoriu nasionál.
“Ha’u kontente, tanba edífisu eskola foun ida ne’e iha sala de aula tolu no haris fatin ida atu manorin no estudante sira iha ambiente saneamentu ne’ebé di’ak liu no atu sente konfortável iha sala de aula ne’ebé foun no luan”, nia apresia.
Diplomata ne’e husu ba estudante sira atu badinas estuda hodi hariku koñesimentu nune’e bele prepara ba futuru ida ne’ebé diak liu hodi kontribui ba dezenvolvimentu nasaun nian.
Diretora Ezekutiva FFHF, Martinha da Silva Pinto, hateten fundasaun ne’e hanesan mos membru ida husi organizasaun sosiedade sivil ne’ebé tau prioridade ba asuntu edukasaun servisu hamutuk ho MEJD hodi kontribui ba dezenvolvimentu setór edukasaun iha Timor-Leste.
Iha 2020, FFHF hetan fiar husi Embaixada Japaun hodi halo konstrusaun ba Eskola Bázika Filiál Builico.
“Hanesan ONG lokál, ha’u agradese tebes ba povu no Governu Japaun ne’ebé fo ona apoiu orsamentu $90,825 hodi harii eskola ida ne’e atu fasilita timor-oan sira, liuliu ba komunidade aldeia Builico hodi asesu ba edukasaun”, nia realsa.
Notísia relevante: PM Taur inaugura eskola TEKVOK Maria Regina Guterres Metinaro
Jornalista: Afonso do Rosário
Editora: Isaura Lemos de Deus
