DILI, 08 maiu 2023 (TATOLI)—Meza Parlamentu Nasionál (PN), liuhosi reuniaun plenária, segunda ne’e, anunsíu no baixa proposta-lei númeru 57/V(5a) Grande Opsaun Planu (GOP) ba 2024 ba komisaun C trata asuntu Finansa Públika hodi halo apresiasaun inisiál.
Notísia Relevante: Meza PN sei baixa proposta-lei GOP 2024 ba komisaun permanente
“Anúnsia no baixa ba Komisaun C hodi halo apresiasaun inisál no relatóriu paresér prazu loron 20, nomós baixa mós ba komisaun espesilizada permanente sira seluk,” Prezidente Parlamentu Nasionál, Aniceto Longuinhos Guterres Lopes, hateten iha sala plenária, PN.
Enkuantu foin lalais Governu aprezenta proposta-lei GOP 2024 ba Parlamentu Nasionál ho despeza global proposta-lei Orsamentu Jerál Estadu (OJE) 2024 biliaun $2,07.
Proposta-Lei GOP 2024 kontempla valór despeza globál Setór Públiku Administrativu ho montante biliaun $1,7; Seguransa Sosiál millaun $291,9 no RAEOA millaun $81,1, ho total despeza globál ba proposta OJE 2024 hamutuk billion $2,07.
Proposta-lei ne’e inklui medida prinsipál konjuntu hamutuk 124 medida, tantu anuál no plurianuál, organizadu iha área estratéjiku 16 ne’ebé Governu sei foku ba iha 2024.
Kompara ho Lei GOP 2023, iha proposta-lei GOP 2024 ne’e Governu halo redusaun signifikativu ba medida prinsipál hosi 275, medidas tun ba 124 medida entaun iha redusaun 151 medida ka 45% no ida-ne’e akontese tanba Governu halo rasionalizasaun.
Área estratéjiku 16 ne’e inklui Konektividade Nasionál; Edukasaun no Formasaun; Saúde; Dezenvolvimentu Territoriál no Abitasaun; Agrikultura, Peska no Floresta; Ekonomia no Empregu; Petróleu no Minerál; Eletrisidade no Enerjia Renovavél; Inkluzaun no Protesaun Sosiál; Bee no Saneamentu; Turizmu; Ambiente; Kultura no Patrimóniu; Reforma Estadu; Defeza no Seguransa Nasionál; Relasaun Internasionál no Polítika Esterna.
Iha semana kotuk, Konsellu Ministru aprova ona projetu Proposta-Lei das Grandes Opções do Plano (GOP) 2024 ne’ebé mak aprezenta hosi Ministru Finansa, Rui Gomes.
Fulan kotuk, Ministériu Finansa mós realiza ona Jornada Planeamentu iha ne’ebé Membru Governu hamutuk ho responsavél Entidade Estadu 109 diskute ona senáriu fiskál, opsaun tetu orsamentál ba 2024 inklui halo ona apresiasaun ba medida prinsipál ne’ebé mak kontempla ona iha Proposta-Lei GOP 2024.
Prpoposta-lei GOP 2024 ne’e mós inklui ona rekomendasaun sira hosi Konsultasaun Sidadania ne’ebé mak Ministériu Finansa hamutuk ho Liña Ministeriál relevante hanesan Edukasaun, Saúde, Obras Públikas, BTL, EDTL, Agrikultura no Turizmu halo ona ho parte interesada sira hanesan Xefe Suku, reprezentante Veteranu, Juventude no lider relijiozu, no involve ema besik rihun 300 iha Munisípiu Aileu, Ainaro, Bobonaro, Ermera, Lautém no Viqueque.
Jornalista : Nelson de Sousa
Editór : Cancio Ximenes
