AILEU, 08 maiu 2023 (TATOLI) – Diretór Interinu Edukasaun Munisípiu Aileu Miguel Moniz Pires, informa tuir dadus rejista ne’ebé iha, professor hamutuk 120 mak tama ona ba idade reforma.
“Tuir dadus ne’ebé mak rejistu iha Edukasaun Munisípiu Aileu, profesór ne’ebé mak tama ona idade reforma hamutuk ema nain-120. Sira ne’e maioria tama ona idade 60, balun ne’e tama ba idade 65 no balun mós tama ona idade 67”, Miguel Moniz Pires hateten ba TATOLI iha Administrasaun Munisípiu Aileu, segunda ne’e.
Nia esplika, maske profesór sira tama ona lista reforma, maibé Ministériu Edukasaun mak seidauk foti desizaun ruma.
“Ami informa ona situasaun ne’e ba Ministériu Edukasaun, maibé ministériu seidauk foti desizaun ruma ba ida ne’e tanba sei presiza hela sira-nia servisu, tanba profesór sei menus no profesór atu susbtitui profesór sira ne’ebé agora tama ona ba idade reforma mak seidauk iha”, nia dehan.
Maske nune’e, Miguel Moniz Pires, kontinua husu ba MEJD atu toma atensaun ba kestaun ne’e, iha Munisípiu Aileu, totál profesór hamutuk 725, kompostu hosi kontratadu 112.
“Ami sei propoen nafatin ba Ministériu Edukasaun hodi aumenta nafatin profesór, atu bele troka fila ita-nia profesór lubuk ida ne’ebé mak husik ona sira-nia kargu hanesan profesór hodi transfere ba fali Ministériu Edukasaun, balun ne’ebé sei pasa ba idade reforma no balun ne’ebé husik ona mundu ne’e”, nia subliña.
Iha lei mós deskreve iha reforma obrigatóriu, Edukasaun Munisípiu Aileu husu MEJD atu toma atensaun ba kestaunn ne’e, atu bele eleva liután prosesu apredizajen ho di’ak iha munisípiu Aileu.
Bazea ba lei númeru 6/2012 no dekretu lei númeru 23/2012, funsionáriu MEJD iha rejime rua hanesan rejime jerál ba funsionáriu administrasaun no rejime espesiál ba professor.
Notísia relevante : Profesór idade reformadu 2.060 sei kontinua serbisu
Jornalista: Natalino Costa
Editór : Zezito Silva
