DILI, 18 jullu 2022 (TATOLI)–Diresaun Nasionál Rekursu Umanu Ministériu Edukasaun Juventude no Desportu (MEJD) rejista profesór ho idade reforma (60 ba leten) hahú hosi tinan 2000 to’o agora hamutuk 2.060, to’o oras ne’e sei kontinua serbisu.
”Ha’u foin mak hetan dadus profesór reformadu tinan ida-ne’e, hahú hosi tinan 2000 to’o 2022, tanba ha’u serbisu hamutuk ho Komisaun Funsaun Públika. Ita iha totál profesór idade reformadu hamutuk 2.060 maibé sira sei ativu hela,” Diretór Nasionál Rekursu Umanu MEJD, Jacinto Varela, informa iha ninia knaar fatin, edifísiu MEJD, iha Vila verde, segunda ne’e.
Notísia relevante: KFP rejista funsionáriu Públiku na’in-845 uza direitu reforma
Nia dehan, parte Rekursu Umanu prontu halo prosesu pedidu profesór reformadu sira bainhira profesór sira rasik aprezenta ona pedidu reforma.
“Maibé kuandu sira la aprezenta pedidu reforma, parte Rekursu Umanu sei labele halo prosesu tanba sira sei ativu hela,” nia akresenta.
Bazeia ba lei númeru 6/2012 no dekretu-lei númeru 23/2012, funsionáriu hotu iha MEJD iha rejime rua hanesan rejime jerál ba funsionáriu administrasaun no rejime espesiál ba profesór sira.
“Agora reforma rasik, filafali ba ema ida-idak, tantu funsionáriu administrasaun inklui profesór sira. Ami iha profesór balun ho idade 60 no 70 resin mak to’o agora sei hanorin hela, ida-ne’e ita konsidera implementasaun lei maka seidauk didi’ak,” Diretór ne’e haktuir.
Jornalista : Tomé Amado
Editora : Julia Chatarina
