STAE fó formasaun ba ofisiál eleitorál 420 iha Maliana

MALIANA, 08 maiu 2023 (TATOLI)-Sekretariadu Tékniku Administrasaun Eleitorál (STAE) munisípiu Bobonaro, segunda ne’e fó formasaun loron rua ba ofisiál eleitorál na’in-420 iha postu adminsitrativu Maliana hodi prepara apoia prosesu eleisaun parlamentáretár 21 maiu 2023.

Diretór STAE munisípiu Bobonaro, Mariano Viegas Amarál, esplika, iha loron (03/05) ne’e hahú fó formasaun dahuluk ba ofisiál eleitorál sira iha postu administrativu Bobonaro, Lolotoe no postu administratrativu Cailaco no iha loron (05/05) to’o (06/05) semana kotuk ne’e hala’o iha postu administrativu Balibo no Atabae.

“Ohin ikus liu ne’e ita halo iha postu administrativu Maliana, sira tuir formasaun kona-bá papél sira-nian, kada ofisiál sira sei halo saida iha sentru votasaun, segundu sira tenke hatene prosesu votasaun ne’e oinsá ho ninia regra hotu kedas, terseiru sira mós tenke hatene prosesu kontajen, depois prosesu votasaun sira tenke halo kontajen votu, depois ho ninia regra sira, lei númeru 9/2017, artigu saida-saida mak ko’alia kona-bá klasifikasaun votu, sira komprende hotu atu implementa atividade sira-ne’e ho di’ak,” Mariano informa ba Jornalista sita, iha Jináziu Maliana.

Dirijente STAE munisípiu Bobonaro ne’e subliña, durante formasaun sei esplika liu regra ne’ebé regula ofisiál eleitorál sira hanesan krime eleitorál ne’ebé prevista iha Kódigu Penál, artigu 229 to’o artigu 242.

“Ha’u-nia mensajen ba ofisiál eleitorál tomak katak, ita-boot sira mai tuir formasaun ho konsiénsia tomak, nune’e bele tuir ho didi’ak, aprende iha prosesu formasaun ne’e hodi implementa iha atividade eleisaun 21 maiu ne’e bele la’o ho di’ak,’ Diretór ne’e akresenta.

Administradór postu administrativu Maliana, Tomás Laco-Loe, husu ofisiál eleitorál sira atu partisipa formasaun ne’e ho vontade nune’e bele servisu tuir baze legál sira iha ona atubele fó susesu ba eleisaun lejizlativa ne’ebé sei hala’o iha tempu badak.

“Ita serbisu de’it loron ida ka rua, maibé ninia kontribuisaun ne’e boot tebes, kuandu ita la hatudu ita-nia profesionalizmu, ikus mai ema ba tuur iha kadeira mamar ita ba tuur fali kadeira iha Becora no Gleno. Ne’ebé ita-boot sira hanesan jerasaun foun serbisu didi’ak ba atu ita-nia eleisaun bele la’o ho susesu,” nia afirma.

Enkauntu totál ofisiál eleitorál iha munisípiu Bobonaro na’in-1,700. Hosi númeru ne’e sei koloka kada estasaun votu na’in-10.

Entretantu totál eleitór elijível  iha munisípiu Bobonaro atu vota iha eleisaun parlamentár na’in-72.537, komposta hosi Atabae 8.843 komposta hosi mane 4.951 no feto 3.892.

Balibo 11.827 iha mane 6.113 no feto 5.714, Bobonaro na’in-17.700 iha mane 8.753, feto 8.946. Cailaco na’in-7.873 iha mane 4.338 no feto 3.535.

Hosi parte Lolotoe na’in-5.388 iha mane 2.646, feto 2.742 no postu administrativu Maliana hamutuk na’in-20.906 komposta hosi mane 10.533 no feto 10.373.

Tuir dadus hosi STAE katak, totál sentru votasaun (CV, sigla portugés) iha munisípiu Bobonaro hamutuk 150 no estasaun votasaun (EV, sigla portugés) 170  mai hosi postu administrativu Atabae iha CV 14 no EV 16.

Balibo CV 22 no EV 26, Bobonaro CV 48 no EV 50, Cailaco iha CV 17 no EV 18, Lolotoe iha CV 17 no EV 18 no postu administrativu Maliana iha CV 34 no EV 42.

Notísia relevante: STAE Bobonaro ho autoridade sivíl-militár diskute preparasaun ba eleisaun

Jornalista: Sérgio da Cruz

Editór: Evaristo Soares Martins