BAUCAU, 08 maiu 2023 (TATOLI) – Sekretariadu Tékniku Administrasaun Eleitoral (STAE) munisípiu Baucau sei koordena ho autoridade administrasaun munisipál kona-ba oras distribusaun materiál sensitivu no la’ós-sensitivu ba sentru votasaun.
Diretór STAE munisípiu Baucau, Natividade Freitas Guterres, esplika, koordenasaun refere importante tanba bazea ba loron distribuisaun materiál sira ba sentru votasaun aserta ho loron isár bandeira hodi komemora loron restaurasaun independénsia 20 maiu.
“Prosesu distribusaun materiál presiza aselera, lae sei hasoru difikuldade iha terrenu bainhira materiál sira to’o tarde tanba sei presiza halo preparasaun,” Diretór STAE Baucau informa ba Agência TATOLI iha Sentru Konvensaun Baucau (CCB, sigla portugés), Vila Antiga, segunda ne’e.
Serimónia isár bandeira nasionál sei realiza ho durasaun oras naruk nune’e bele afeta ba prosesu distribusaun materiál sensitivu no la’ós-sensitivu ba sentru votasaun iha munisipál Baucau tanba fatór distánsia, kondisaun estrada inklui kondisaun klima.
Bazea ba karta hosi STAE nasionál ba Autoridade Administrasaun Munisipál katak prosesu serimónia distribuisaun materiál sensitivu no la’os-sensitivu tenke realiza iha dader oras 08:00 resin tanba ne’e prosesu isár bandeira labele fó impaktu ba distribusaun materiál sensitivu.
“Ita sei planu atu koordena ho Prezidente Autoridade atu oinsá buka solusaun ne’ebé di’akliu,” Natividade Guterres akresenta.
Tuir kalendáriu eleisaun parlamentár tinan-ne’e sei realiza iha loron dumingu, 21 maiu nune’e prosesu distribusaun materiál sensitivu no la’os sensitivu sei realiza iha loron sábadu, 20 maiu ne’ebé iha loron hanesan Timor-Leste sei komemora mos loron restaurasaun independénsia ba dala-22.
Notísia relevante: STAE realiza formasaun ba ofisiál eleitorál postu Baucau Vila
Jornalista : Natalino Belo
Editór : Evaristo Soares Martins
