DILI, 08 maiu 2023 (TATOLI)–Polísia Nasionál Timor-Leste (PNTL) liuhosi Unidade Tránzitu Komandu munisípiu Dili, halo pasa revista iha domingu (07/05) no konsege halo apreensaun ba transporte ne’ebé viola kódigu estrada.
“Komandu Polísia munisípiu Dili realiza pasa revista ba transporte públiku sira hanesan karreta motorizada. Hosi pasa revista ne’e halo apreensaun karreta 15 no motorizada rua,” Portavós Komandu PNTL, Superentende Xefe Arnaldo Araújo, hateten liuhosi konferénsia imprensa, iha Kuartel Jerál PNTL, Caicoli, segunda ne’e.
Transporte ne’ebé hetan apreensaun daudaun iha hela Komandu munisípiu Dili hodi submete ba prosesu tuir-mai.
Notísia relevante : Viola rezolusaun Governu, ekipa konjunta halo apreensaun ba karreta Estadu 11
Biban hanesan, Unidade Trázitu mós halo apreensaun ba dokumentu karreta no motorizada hamutuk 18.
“Polísia Tránzitu foti hela sira-nia dokumentu no transporte fíziku ida-idak lori ba uma,” nia akresenta.
Portavós Komandu ne’e apela ba públiku katak sé de’it mak uza transporte públiku hanesan karreta no motorizada, kuandu atu sai tenke lori dokumentu kompletu no válidu.
“Labele haluha mós katak asesoris karreta no motorizada tenke kompletu, ezemplu xapa matríkula de’it mak laiha sei kona multa $50. Asesoris motorizada ne’e importante hodi nune’e evita mós risku ba dezastre, no importante liu mak karta kondusaun,” nia fó hanoin.
Nia dehan, bainhira sidadaun ne’ebé viola regra tránzitu no Polísia halo ona apreensaun, maka tenke selu koima tanba regra iha hotu ona.
Jornalista : Antónia Gusmão
Editora : Julia Chatarina
