DILI, 09 maiu 2023 (TATOLI)–Komisaun Nasionál Eleisaun (CNE, sigla portugés) identifika iha partidu balun ‘kasa’ votu iha tempu kalan.
“Partidu balun hala’o kampaña liu oras, dala ruma tuku 18:30 otl mós hala’o hela kampaña ho tipu door to door. Ami foti medida hodi hapara sira balun, iha mós tendénsia halo gratifikasaun, signifika fó materiál ba eleitór sira, ami hakerek karta ona ba sira hodi fó hatene katak evita tanba ne’e krime, gratifikasaun ne’e iha tendénsia atu sosa ema-nia votu,” Prezidente CNE, José Belo, hateten, iha CNE Colmera, tersa ne’e.
Órgaun eleitorál ne’e konsidera aktu ne’e kontra lei tanba bazeia ba Kódigu Penál Timor-Leste, artigu 234, katak bainhira CNE haree keixa ne’e forte sei submete ba Ministériu Públiku.
“Investigasaun la’o hela, ne’ebé ami labele indika ba partidu ida maibé atu fó hanoin nafatin katak kalan ona labele halo atividade kampaña. Dala barak sira hanoin katak hosi dadeer tuku 08:00 to’o 18:00 otl ne’e kompaña ho tipu komísiu, maibé door to door ne’e laiha, atu husu katak lee didi’ak lei eleitorál katak kualker tipu kampaña inklui door to door, ne’ebé tempu hemu kafé ne’e iha oras, la’ós hemu kafé to’o dadeer, vizita malu mós tenke evita ona, fahe sasán mós para tiha lai, sé sasán no osan barak liu tau lai iha banku depois kampaña hotu mak bele fahe fali,” nia akresenta.
Notísia relevante: CNE identifika partidu kiik balun la kumpre oráriu kampaña eleitorál
CNE nota katak informasaun tentativa sosa votu akontese iha Viqueque no iha mós parte balun maibé investigasaun la’o hela.
“Tanba sira haree katak ema ne’ebé fó ne’e mai hosi partidu ka individuu, maski nune’e tenke identifika nia mai hosi partidu ida-ne’ebé,” nia dehan.
CNE rejista kazu hamutuk hitu, daudaun parte legál análiza hela hodi define loloos ida-ne’ebé mak kategoria krime no krime administrativu, enkuantu ida-ne’ebé parte seguransa halo intervensaun direta ne’e iha parte seguransa nia.
Jornalista : Antónia Gusmão
Editora : Julia Chatarina
