DILI, 09 maiu 2023 (TATOLI) – Ministériu Edukasaun Juventude no Desportu (MEJD) sei asina kontratu ho profesór reklamante na’in-30 hosi Munisípiu Liquiçá.
Diretór Servisu Edukasaun Liquiçá, Carlos Lopes, relata katak profesór voluntáriu sira ne’e sei asina kontratu iha faze daruak bazeia ba númeru vaga ne’ebé maka ministériu oferese, tanba iha dahuluk ne’e manorin na’in-56 mak hetan ona kontratu.
“Ita hetan númeru vaga ba faze daruak ne’e hamutuk na’in 30 de’it, tanba vaga dahuluk ita hetan ona profesór 56. Ne’ebé totál profesór voluntáriu hamutuk 86 maka sei sai kontratadu iha tinan ida ne’e”, Carlos Lopes informa ba Tatoli via telefone, tersa ne’e.
Nia esplika katak, iha segunda faze ne’e, dosente hamutuk 148 maka lapasa iha selesaun dokumentu ne’ebé ekipa júri hosi MEJD halo.
“Profesór voluntáriu na’in-148, hosi ne’e maka hasai tiha 30 ba kontratadu no ita sei iha manorin 118 mak kontinua hela ho estatutu voluntáriu, maibé oportunidade ne’e sei mai iha tempu Governu Dasiak nian”, nia afirma.
Servisu Edukasaun Liquiçá submete ona dokumentu hosi profesór 30 ba Ministériu Edukasaun nasionál hodi hala’o sira-nia serbisu verifikasaun, nune’e iha semana ida ne’e nia laran bele fó sai rezultadu atu sira bele hahú prepara hodi loke konta bankária no dokumentu importante sira seluk ne’ebé ministériu presiza.
Relasiona ho manorin reklamante sira ne’ebé sei asina kontratu, iha Edukasaun Baucau aprezenta mós profesór voluntáriu 30 ne’ebé selesionadu atu sai kontratadu.
Tuir dadus husi Ministériu Edukasaun, totál profesór iha territóriu hamutuk 25.203, ne’ebé kompostu hosi permanente, voluntáriu no kontratadu.
Notísia relevante: Profesór reklamante 30 iha Baucau sei asina kontratu ho MEJD
Jornalista: Tomé Amado
Editora: Maria Auxiliadora
