DILI, 01 maiu 2023 (TATOLI) – Diretór Servisu Edukasaun Munisipál Baucau, Augusto Ornai Ximenes, informa katak lista profesór reklamante na’in-30 ne’ebé selesionadu iha faze daruak submete ona ba Ministériu Edukasaun, Juventude no Desportu (MEJD) hodi hein prosesu ba asina kontratu.
“Profesór reklamante sira ne’e mak konsideradu atu hakat bá permanente no sei asina kontratu iha tempu besik”, dehan Augusto Ximens ba Tatoli via telefone, segunda ne’e.
Tuir dirijente, totál manorin ne’ebé lapasa selesaun dokumentu iha faze daruak ne’e hamutuk 408. “Profesór sira ne’e hetan oportunidade ba daruak atu hatama sira-nia reklamasaun iha loron 15, maibé bainhira ekipa júri halo filafali avaliasaun hetan de’it dokumentu hamutuk 315. Signifika reklamante 93 mak la hatama sira-nia dokumentu sein justifikasaun”, nia realsa.
Depois júri avalia tiha dokumentu hosi profesór voluntáriu 315 ne’ebé sai profesór reklamante ne’e, iha de’it na’in-30 maka nia dokumentu prienxe kritériu ne’ebé maka estabelese ona no merese sai nu’udar profesór kontratadu iha faze daruak.
“Hosi prosesu ne’e maka ita konsidera iha profesór na’in-30 mak pasa no 285 konsidera lapasa. Sira ne’ sei hein filafali faze tuirmai”, nia esplika.
Nune’e, profesór voluntáriu iha Baukau ne’ebé admitidu ba permanente hamutuk 307. Hosi faze dahuluk iha na’in-277 no daruak iha 30.
Totál profesór voluntáriu ne’ebé maka tuir hotu ona prosesu iha selesaun dokumentu ne’ebé realiza iha Baucau ne’e hamutuk 685, husi ne’e 307 admitidu, 285 lapasa no 93 retira sein justifikasaun.
Notísia relevante: Edukasaun Baucau submete ona lista profesór reklamante ba MEJD
Jornalista: Tomé Amado
Editora: Maria Auxiliadora
