Eskola TEKVOK Soibada iha prosesu rekonversaun ba ESG
MANATUTO, 09 maiu 2023 (TATOLI)—Diretór Servisu Edukasaun Munisípiu Manatuto, Graciano de Jesus Baptista, hateten Ensinu Sekundáriu Tékniku Vokasionál (TekVok) iha ona prosesu rekonversaun, nune’e tinan rua mai tama ona ba Ensinu Sekundáriu Jerál (ESG, sigla portugés).
“Ensinu Sekundáriu Tékniku Vokasionál (TEKVOK) Soibada iha ona prosesu rekonversaun nia-laran, nune’e tinan rua mai laiha ona TEKVOK no sei kompleta ho ensinu sekundáriu jerál (ESG) de’it,” nia hateten ba Agência Tatoli iha nia kna’ar fatin, tersa ne’e.
Diretór ne’e hateten, tinan ne’e sira só kontinua de’it ho segundu ano ho treseiru ano nian de’it maibé primeiru ano tama ona ba ensinu sekundáriu ona.
“Ita loke tiha tékniku vokasionál iha ne’ebá ne’e envez númeru estudante sa’e, ne’e lae fali, nia tinan-tinan estudante menus fali no até amesa atu taka, entaun ita halo rekonversaun nune’e kontinua fali ho ensinu sekundáriu jerál,” nia hateten.
Bainhira muda ba ensinu sekundáriu jerál ema barak mak ba tau naran no asesu fali sekundáriu jerál ne’e.
Tanba ne’e, nia dehan, TEKVOK ne’e área ida de’it entaun ema barak mak lakohi tanba hanesan maun-alin na’in-tolu haat mak hotu-hotu eskola iha TEKVOK entaun ema lakohi, ema hakarak buka área oioin.
“Ne’e ami simu sirkukár ida hosi Diretór Jerál MEJD katak tinan ne’e simu estudante ba sekundáriu jerál nian,” nia dehan.
Diretór Ensinu Sekundáriu Tékniku Vokasionál iha postu administrativu Soibada, munisípiu Manatuto, Joanico da Costa, hateten tinan-tinan estudante menus nune’e tinan ne’e hahú kontinua fali ho ensinu sekundáriu jerál.
“Razaun primeiru mak estudante nia númeru hahú menus. Segundu mak estudante iha familia ida lakohi hotu-hotu hasai kursu iha área ida de’it. Treseiru mak ensinu sekundáriu jerál iha liu posiblidade ba área sira-ne’ebé eziste iha universidade sira.
Tanba área Turizmu no Ospitalidade kuaze iha universidade uitoan de’it mak eziste departamentu ne’e. Entaun, implika ba labarik barak prefere liu ESG duké TEKVOK,” nia hateten.
Totál estudante hamutuk 128, manorin iha na’in-13 ne’ebé kompostu hosi professor kontratadu 11 no voluntáriu na’in-rua (2).
Iha Soibada, nia dehan, Eskola Sekundária ida, Ensinu báziku Katólika tolu (3), Ensinu Báziku Filiál lima (5), Pre-eskolár rua (2).
Pre-eskolar iha munisípiu Manatuto iha 19, Internasionál Scool iha ida (1), KAFI ida, ensinu báziku iha 18, públiku 16 no privada rua (2), sentru ensinu filiál 59, ensinu sekundáriu jerál rua (2), privada lima (5) no ensinu sekundáriu tékniku vokasionál tolu (3).
Jornalista : Osória Marques
Editór : Cancio Ximenes
