DILI, 09 maiu 2023 (TATOLI)—Koordenadór Jerál Kampaña Eleisaun Parlamentár 2023 Partidu Libertasaun Populár (PLP), António Freitas, husu ba militante no simpatizante sira atu kontinua kria pás no estabilidade iha ámbitu kampaña ba Eleisaun Parlamentár 2023.
“Husu ba militante sira atu hakmatek nafatin hodi kria pás durante ita-nia Prezidente PLP laiha. Maski laiha maibé ita-nia atividade partidu nian kontinua la’o iha territóriu tomak hanesan halo kampaña, diálogu no seluk tan, to’o halo enserramentu kampaña partidu iha loron 18 maiu iha Ermera, Gleno,” António Freitas, hateten iha sede PLP, Vila-Verde, tersa ne’e.
Prezidente PLP no atuál Primeiru Ministru, Taur Matan Ruak, desloka ohin hodi ba partisipa iha Simeira Asosiasaun Nasaun Sudeste Aziátiku (ASEAN, sigla inglés) iha Labuan Bajo, Nusa Tenggara Timur, Indonézia no sei filafali mai iha loron 13 maiu 2023.
Notísia relevante : Xefe Governu sei partisipa konferénsia altu nivél ASEAN iha Labuan Bajo
Koordenadór ne’e dehan, presiza kontinua kria ambiente pás tanba durante kampaña, hahú iha loron 19 abríl to’o 05 maiu buat hotu la’o di’ak no tenke mantein to’o ramata iha loron 18 maiu.
“Hato’o agradese tebes ba maturidade polítika povu tomak ne’ebé partisipa kampaña ho disiplina tuir prosedimentu eleitorál hosi Komisaun Nasionál Eleisaun (CNE, sigla portugés),” nia akresenta.
Nune’e, líder partidu másimu sira kontinua depózita konfiansa ba ekipa destakamentu sira, liuliu líder nasionál ne’ebé destaka iha munisípiu to’o postu administrativu sira hodi mantein pozisaun kalma durante kampaña la’o.
“Ita hotu hatene iha fatin-fatin partidu barak kontinua halo atividade door to door, maibé ita respeita nafatin no hadook-an hosi konflitu ka konfrontasaun entre partidu polítiku sira seluk,” nia dehan.
Koordenadór klarifika, informasaun katak iha kuadru PLP halo atividade door to door ne’e la loos
“Atu hateten katak ida-ne’e la loos. PLP no partidu sira seluk kontinua ida-idak la’o mesak tuir desizaun hosi CNE ne’ebé hateten iha Eleisaun Parlamentár 2023, ne’e partidu polítiku 17 mak partisipa inklui PLP, signifika tuu iha kada partidu mak loos, ba PLP vota iha númeru 03,” nia tenik.
Jornalista : Arminda Fonseca
Editora : Julia Chatarina
