MALIANA, 09 maiu 2023 (TATOLI) – Falta deit loron 10 atu komemora loron restaurasaun independénsia Timor-Lste, 20 maiu ba dala-21, nune’e Prezidente Autoridade Munisípiu Bobonaro, Ernesto de Oliveira Barreto, husu ba komunidade sira tenke hasa’e bandeira Repúblika Demokrátika Timor-leste (RDTL) aas liu bandeira partidu polítiku nian.
Notísia relevante: PNTL Bobonaro preparadu asegura Eventu komemorasaun 20 de maiu
“Ha’u hakarak fó mensajen ba sosiedade tomak iha munisípiu Bobonaro, hahú hosi suku to’o aldeia, hasa’e bandeira karik ai-loos ho au-loos ne’e la sosa, bandeira nasionál ne’e tenke aas-liu bandeira partidu polítiku nian, tanba ita ukun-aan lai mak foin iha partidu, se ita la ukun-an ita laiha partidu,” nia informa ba jornalista sira, iha kna’ar-fatin, tersa ne’e.
Lideransa munisípiu ne’e haktuir, komemorasaun 20 maiu iha tinan sira antes, nivel munisipál sempre realiza iha kampu futeból Maliana Vila, maibé tinan ne’e sei hala’o fali iha resintu administrasaun munisipál Bobonaro.
Autoridade munisipál ne’e hatutan, razaun la halo serimónia boot tanba autoridade seguransa sira hahú iha loron 20 maiu desloka hotu ona ba suku sira hodi asegura materiál sensitivu eleisaun parlamentár nian.
Maske komemorasaun tinan ne’e la konsentra iha fatin ida hanesan tinan sira antes, maibé Prezidente Autoridade Munisípiu husu komunidade atu hasa’e bandeira nasionál no sunu-lilin iha idak-idak nia uma oin hodi fo onra ba eroi sira-ne’ebé sakrifika sira nia-aan mate ba rai ida- ne’e.
Notísia relevante: Autoridade Bobonaro prevee rihun $10 komemora loron 20 maiu
Jornalista : Sérgio da Cruz
Editór : Evaristo Soares Martins
