OÉ-CUSSE, 09 maiu 2023 (TATOLI) –Komandante Polísia Nasionál Timor-Leste (PNTL), Rejiaun Administrativa Espesiál Oé-Cusse Ambeno (RAEOA), Superintendente Xefe Polísia, Mateus Assunção Mendes, informa, daudaun ne’e parte PNTL esforsa hodi buka-tuir autór ne’ebé sunu bendeira Partidu Kongresu Nasionál Rezisténsia Timorense (CNRT), ne’ebé akontese iha suku Usitaku, sub-rejiaun Nítibe.
Notísia relevante: Kampaña FRETILIN iha Oésilo, CNE-PNTL ‘kaer-toman’ funsionáriu ida uza patrimóniu Estadu
Dirijente PNTL ne’e, esplika, rezultadu identifikasaun hosi parte PNTL iha terrenu katak, kronolojia hosi akontesimentu ne’e, akontese iha loron segunda, 08 maiu, ema deskoñesidu ba hasai bandeira ne’e iha uma ida nia oin, hodi halo asaun sunu iha fatin dook.
“PNTL hetan ona informasaun ne’e, maibé hala’o hosi ema deskoñesidu, ne’ebé PNTL rasik seidauk identifika ema-ne’ebé halo asaun ida-ne’e, maibé membru sira sei esforsu, mumentu ida-ne’e hodi oinsá mak bele identifika, karik iha duni ema mak halo asaun sunu bendeira partidu nian, ita tenta lori ba iha prosesu, maibé infelismente ita esforsa hela atubele hatene no deskobre, ema ida halo asaun ne’e, bandeira ne’e hosi partidu CNRT nian,” Mateus Assunção Mendes, informa ba jornalista sira iha Oé-Cusse, tersa ne’e.
Diretór CNE Oé-Cusse, Tomas Oqui Meta, reforsa tán, parte CNE mós informa ba autoridade komunitária hamutuk ho PNTL hodi kontinua buka tuir kauza hosi akontesimentu ne’e.
“Kazu ida-ne’e akontese iha suku Usitaku, sub-rejiaun Nítibe, militante partidu seluk sunu bandeira partidu CNRT, to’o agora parte PNTL, CNE no autoridade komunitáriu sira, buka hela autór ne’e maibé seidauk hetan, karik iha tempu badak, sira bele hetan depois mak ita haree nia prosesu la’o oinsá,” nia katak.
Entretantu, liga ho akontesimentu ne’e, jornalista Tatoli tenta konfirma ho xefe suku Usitaku, Hilario Babo, lihosi kontaktu telefónika maibé númeru telefoni mate hela.
Notísia relevante: CNE rejista keixa rua durante kampaña eleitorál iha Oé-Cusse
Jornalista : Abílio Elo Nini
Editór : Evaristo Soares Martins
