DILI, 09 maiu 2023 (TATOLI)–Komisaun Nasionál Eleisaun (CNE, sigla portugés) identifika iha Xefe suku balun utiliza patrimóniu Estadu hodi partisipa iha kampaña eleitorál hosi partidu Frente Revolusionária Timor-Leste Independente (FRETILIN) iha postu administrativu Maliana, munisípiu Bobonaro.
“Loos duni, iha Maliana iha Xefe suku sira barak uza motorizada Estadu hodi partisipa kampaña partidu FRETILIN nian. Aleinde ne’e, membru Governu balun mós utiliza mós karreta Estadu,” Prezidente CNE, José Belo, hateten iha salaun Colmera, tersa ne’e.
Liga ba kestaun ne’e, órgaun eleitorál ne’e haruka ona karta Ministru Administrasaun Estatál (MAE) hodi fó atensaun, nune’e mós informa ba partidu refere katak aktu ne’e viola regra.
“Sira hatene di’ak tebes tanba sira ukun dala barak ona no hatene ona regra, lei mós sira mak halo, dala ruma diskute malu fali ho CNE maibé realidade maka deputadu sira aprova lei iha Parlamentu, deputadu sira ne’e hosi partidu refere. CNE implementa de’it lei ne’ebé iha, ne’ebé atu dehan hatene mak halo ne’e sansaun todan liu,” nia esplika.
Notísia relevante : CNE identifika partidu balun ‘kasa’ votu iha tempu kalan
Nia dehan, CNE nafatin esplika ba partidu polítiku atu muda komportamentu maibé bainhira la muda nafatin maka povu mak sei julga iha loron votasaun.
“Balun iha ona keixa, balun Polísia sira haree hela no balun mai hosi ami-nia ofisiál sira haree katak kazu la hanesan. Patrimóniu Estadu ne’ebé sira uza hanesan iha Maliana no fatin seluk. Prosesu daudaun, sira ne’ebé komete ita foti medida, balun la hatene kona-ba situasaun hanesan sira ne’ebé hanesan membru Governu, Administradór postu, Xefe suku sira dehan bele utiliza dentru sira halo serbisu, maibé labele ba partisipa kampaña, daudaun lei ne’ebé iha mak lei eleitorál ne’ebé durante fulan-ida sira labele uza kampaña, serbisu seluk bele utiliza,” nia akresenta.
CNE mós nota katak iha entidade balun hasa’e bandeira partidu iha edifísiu públiku, hanesan iha sede suku.
“Ho ida ne’e, CNE haruka ona karta atu fó hanoin katak bandeira bele dada maibé dada iha ida-idak ninia uma tanba instituisaun públiku ne’e ba hotu-hotu,” José Belo dehan.
Jornalista : Antónia Gusmão
Editora : Julia Chatarina
