EDUKASAUN, DILI, HEADLINE

Eskola Bairro Pité presiza profesór atu apoia prosesu aprendizajen

Eskola Bairro Pité presiza profesór atu apoia prosesu aprendizajen

Diretór-Jerál Administrasaun no Finansa hosi MEJD, Antoninho Pires. Imajen Tatoli/Francisco Sony

DILI, 10 maiu 2023 (TATOLI) – Eskola Bázika Filiál (EBF) Bairro Pité daudaun ne’e hasoru difikuldade iha prosesu ensinu aprendizajen, tanba falta rekursu atu apoia eskola ne’e.

Eis-Koordenadór EBF Bairro Pité, Lucas Brandão da Silva, esplika rekursu menus ne’e tanba profesór balun idade avansadu ona, balun moras no mate.

Nune’e, nia husu ba Ministériu Edukasaun, Juventude no Desportu (MEJD) atu destaka fali profesór foun ho idade produtivu hodi bele apoia prosesu aprendizajen ba alunu sira iha eskola refere.

Lucas Brandão haktuir durante ne’e sira iha de’it profesór na’in-29, hosi ne’e 13 permanente, ualu kontratadu no ualu voluntariu, maibé daudaun hela de’it 25 ne’ebé balun nia kondisaun saúde lapermite atu kontinua tan sira-nia profisaun.

“Ita-nia profesór permanente na’in-tolu no voluntáriu ida mak mate ona. Agora iha de’it na’in-25, maibé na’in haat mós tama ona ba idade reforma”, nia afirma ba Tatoli, iha Bairro Pité, kuarta ne’e,

Eis-koordenadór ne’e hatete eskola submete ona proposta ba MEJD atubele haruka fali manorin balun hodi ajuda prosesu aprendizajen.

Iha sorin seluk, Diretór-Jerál Administrasaun no Finansa, Antoninho Pires, realsa iha ona planu atu tau profesór ba eskola sira ne’ebé presiza, maibé sei haree uluk mapa pessoal no bainhira planu sira ne’e loos ona maka foin halo mobilizasaun dosente sira ba eskola ne’ebé presiza.

“Ita sei koloka de’it profesór permanente sira atu substitui fatin sira ne’ebé mamuk, tanba profesór kontratadu sira sei la tama iha planu ida ne’e”, refere.

Notísia relevante: EBF Bairro Pité prevee $59.020 ba merenda eskolár

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!