DILI, 10 maiu 2023 (TATOLI)—Governu liuhosi reuniaun Konsellu Ministru (KM), kuarta ne’e, aprova ona projetu rezolusaun ne’ebé aprezenta hosi Vise Primeiru-Ministru no Ministru Planu no Ordenamentu, José Maria dos Reis, kona-ba promosaun utiliza estudu karakterizasaun no diagnóstiku estratéjiku sidade Dili inklui ninia área sira.
“Estudu ne’e permite identifika problema prinsipál no potensialidade sira hosi komponente oin-oin ba sistema urbana kapitál nian, nune’e mós potensialidade ba apoiu dezenvolvimentu instrumentu sira ba planeamentu ka estudu sira seluk ne’ebé foku ba área hanesan,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu, iha Palásiu Governu, kuarta ne’e.
Notísia relevante : Governu aprova ona rejime jurídiku ba planu ordenamentu territóriu
Objetivu estudu ne’e maka atu sai hanesan dokumentu apoiu nian, estudu definisaun no delimitasaun jeográfika iha área metropolitana Dili nian no dezenvolvimentu planu munisipál ba ordenamentu territóriu munisípiu Dili.
Aleinde ne’e, dezenvolvimentu instrumentu planeamentu territoriál sira seluk iha ámbitu urbanu, dezenvolvimentu planu setoriál ba sidade no munisípiu Dili, no dezenvolvimentu lejizlasaun kona-ba asuntu sira ho impaktu territoriál iha sidade no munisípiu Dili.
Jornalista : Antónia Gusmão
Editora : Julia Chatarina
