iklan

EDUKASAUN, HEADLINE

Graduadu na’in-20 finaliza kursu iha área eletrifikasaun no instrumentasaun

Graduadu na’in-20 finaliza kursu iha área eletrifikasaun no instrumentasaun

Diretór-Jerál SEFOPE, Paulo Alves. Imajen TATOLI/Francisco Sony

TÍBAR, 11 maiu 2023 (TATOLI) – Timoroan na’in-20 ne’ebé partisipa iha kursu espesífiku iha área eletrifikasaun no instrumentasaun gradua ona iha Sentru Nasionál ba Empregu no Formasaun Profisionál (CNEFP, sigla portugés) iha Tíbar.

Koordenadór Jestaun Rekursu CNEFP Tíbar, Arsénio Pereira de Carvalho, hatete graduando na’in-20 ne’e kompostu husi feto neen no mane 14.

“Formandu na’in-20 ne’ebé gradua daudaun ne’e akaba sira-nia formasaun iha área eletrifikasaun no instrumentasaun, liuliu ba óleo no gás. Rekizitu ne’ebé área formasaun ne’e ezije mak safety, liuliu iha setór petróleu tanba serbisu sira hanesan ne’e presiza atensaun maka’as”, Arsénio Pereira dehan hafoin entrega sertifikadu ba graduadu sira iha Salaun CNEFP Tíbar.

Dirijente ne’e esplika katak formasaun iha área sira ne’e la fásil tanba iha risku, entaun sentru presiza fó atensaun di’ak ba formandu sira no presiza hetan akompañamentu ida ne’ebé adekuadu.

“Formandu na’in-20 ne’ebé akaba ona kursu ne’e konsege hatudu ona sira-nia abilidade, tanba atu tama iha área sira ne’e la fásil no iha rekizitu lubuk ida mak aplika no ezije formandu sira-nia kapasidade”, salienta.

Kritéria atu partisipa iha kursu sira ne’e maka tuir teste ne’ebé fó husi formadór estranjeiru, tenke halo rejistu liuhusi online, formandu sira pelu menus iha background iha área enjeñaria petróleu.

“Ninia rekizitu maka tenke iha koñesimentu báziku, tenke sidadaun timoroan ho tinan 17 ba leten, nune’e bainhira kursu remata, indústria kontrata kedan no labele iha problema kona-ba Lei Traballu, nomós tenke iha koñesimentu língua uitoan tanba matéria sira ne’ebé sei introdús ne’e ho lian-inglés hotu, tanba sira opta padraun internasionál nian”, esplika.

Koordenadór SNEFP lembra katak formasaun ne’e tama ona ba siklu datoluk nian. Siklu dahuluk inisia iha 2017 no segundu iha 2019. Formadór ba kursu ne’e mai husi li’ur ho esperiénsia hanorin iha nivel indústria internasionál nian.

“Iha agostu tinan kotuk maka konsege hahú formasaun ba siklu datoluk nian, tanba ne’e formandu na’in-20 ne’e foin mak remata kursu durante fulan sia iha sentru ida ne’e”, Arsénio Pereira afirma.

Iha fatin hanesan, Diretór-Jerál Sekretaria Estadu Formasaun Profisionál no Empregu (SEFOPE), Paulo Alves, hatete nia parte sei husu ba Governu foun atu kontinua kursu ida ne’e ba joven timoroan sira. “Iha Governu foun mai ha’u sei hatete ba sira tipu formasaun ne’e tenke kontinua no tenke garante sustentabilidade programa ida ne’e”, nia promete.

Nia relembra katak iha inísiu kedan partisipa diretamente iha atividade ne’e hodi halo lobby no asina akordu ho empreza ConocoPillips, agora muda ba Santos hodi  konvida formadór sira hodi hanorin joven timoroan sira.

“Durante ne’e Santos apoiu ona liuhusi ANPM programa ida ne’e tanba programa ne’e ikus ona, maibé tuirmai tenke kontinua formasaun ne’e ba joven sira. SEFOPE hanesan ajente governamentál ne’ebé mak responsavel ba iha área formasaun profisionál no empregu haree katak sentru formasaun ida ne’e importante tebetebes ba joven sira”, katak Paulo Alves.

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!