DILI, 10 maiu 2023 (TATOLI)—Reuniaun Konsellu Ministru (KM) iha kuarta ne’e, aprova ona projetu tolu ne’ebé aprezenta hosi Ministru Obra Públika (MOP), Abel Pires.
“Konsellu Ministru autoriza despeza hodi hahú prosesu aprovizionamentu no formalizasaun tuir kontratu públiku ba ezekusaun obra konstrusaun estrada Soibada bá Soibada Villa ho distánsia kilómetru 9,7, iha munisípiu Manatuto, ho valór estimadu millaun $10,1,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu, iha Palásiu Governu, kuarta ne’e.
Notísia relevante : Reabilitasaun estrada ligasaun Manatuto to’o Baucau ho valór millaun $2,8
Aleinde ne’e, KM autoriza mós despeza hodi hahú prosesu aprovizionamentu no formalizasaun tuir kontratu públiku ba ezekusaun obra konstrusaun sistema abastesimentu bee iha sidade Baucau, ho valór estimandu millaun $27,1.
“Ida-ne’e ho objetivu atu fornese bee-moos ba sidade Baucau, liu-liu área sira-ne’ebé durante ne’e laiha bee-moos hanesan iha Baucau kota baru, entaun projetu ne’e hanesan transformadór ida, nune’e sei tranforma asesu sidadaun sira-ne’ebé hela iha sidade Baucau hodi hetan bee-moos,” nia akresenta.
Nune’e mós, despeza ba konstrusaun estrada entre entronkamentu Laklubar-Laklubar, iha munisípiu Manatuto, ho estensaun kilómetru 10,3, ho valór estimadu millaun $5,8.
Jornalista : Antónia Gusmão
Editora : Julia Chatarina
