Manatuto, 10 maiu 2023 (TATOLI)- Administradór Postu Administrativu Soibada, Munisípiu Manatuto, Luis Gonzaga da Silva, hateten, konstrusaun Uma Naronam ba Povu (UNP) hamutuk 45 iha Soibada, atinje ona 80% no hela 20% atu konklui.
“Kona-ba UNP iha Soibada ne’e rasik, haree ba nia konstrusaun fíziku atinje ona 80%, tanba iha suku Manufahi nian rasik finaliza ona. Ba suku seluk maiória 80%, 75% no kiik liu mak 50%,” nia hateten ba Agência TATOLI liuhusi telefónika, kuarta ne’e.
Luis Gonzaga hatutan katak hosi pursentu 80 ne’e hein kompleta sásan ba laran de’it, daudaun 75% ne’e falta pinta no reboka inklui prenxe sásan no 50% ne’e mak sei falta reboka, nahe azuléizu.
“Maibé ida-ne’e besik finaliza ona tanba hotu-hotu iha prosesu konstrusaun nian no laiha ida mak seidauk hahú”, nia kompromete.
Nia dehan, Uma Naroman ba Povu ho totál benefisiáriu 54 ne’e nia orsamentu maihosi OJE 2022 no implementa iha tinan kotuk.
“Iha ha’u-nia postu ne’e kada suku hetan uma sia, nune’e suku iha lima, nune’e ita hetan hamutuk uma 54”, katak.
Ba UNP+ B, nia hateten Soibada seidauk hetan no hein de’it. Tanba daudaun ne’e ekipa hahú halo identifikasaun ba uma ne’ebé nia fizikamente la di’ak ne’e iha Laclubar no Natarbora nian.
“Tempu badak sei to’o iha Soibada, ida-ne’e ita hein de’it, tanba programa Governu sei to’o iha nia povu sira-ne’ebé presiza duni UNP + B ne’e,” nia hateten.
Governu liuhosi Ministériu Finansa aloka orsamentu besik millaun $8 atu kontinua programa refere, maibé ida ne’e la to’o atu hala’o iha suku hotu-hotu. Tanba iha redusaun 75% hosi orsamentu ne’ebé aloka iha tinan ida ne’e.
Nune’e, Deputadu sira propoin tan osan hamutuk $ 63,600.000, hodi MAE liuhosi PNDS bele implementa Uma Naroman ba Povu iha 2022, atu aumenta uma 10 kada suku. Nune’e , Governu prontu atu implementa programa ida-ne’e
Jornalista : Osória Marques
Editór : Florencio Miranda Ximenes
