VIQUEQUE, 10 maiu 2023 (TATOLI)—Udan-boot iha ponta leste rezulta mota bebui estraga agrikultór sira-nia natar tanba laiha morru protasaun hodi satán mota iha suku Afaloikai, postu Uatulari, munisípiu Viqueque.
“Agrikultór sira-nia preokupasaun ida mak mota laiha morru protesaun hodi satán bee labele tama natar laran. Hahú hosi horiseik mota ho velosidade boot estraga natar, daudaun agrikultór sira atu kuda hare mós ladi’ak,” Xefe suku Afaloikai, Costantinho Guterres, hateten iha suku Afaloikai, kuarta ne’e.
Autoridade lokál ne’e haktuir, tinan kotuk Ministériu Agrikultura no Peska (MAP) konsege harii morru protesaun kuaze metru 300, maibé presiza kria tan purvolta metru 700 hodi proteje tama ba natar laran.
“Tanba ne’e, ha’u husu MAP tau atensaun nafatin ba preokupasaun agrikultór sira tanba ministériu iha kompeténsia dezenvolve setór agrikultura,” nia akresenta.
Notísia relevante : Mota Karau-Ulun ameasa uma-kain 500-resin no natar etare 200 iha Betano
Iha fatin hanesan, Diretóra Jerál MAP, Maria Odete do Ceo Guterres, hateten, ekipa ministériu haree direta ona kondisaun mota ne’ebé tama ba agrikultór sira-nia natar, nune’e sei tau atensaun hodi aloka orsamentu.
“Iha tinan kotuk ami halo ona morru protesaun, maibé daudaun udan-boot kontinua sobu natar. Nune’e ohin ha’u haree ona no ita sei tau osan hodi halo morru protesaun. Governu iha kompromisu hodi proteje kanais irrigasaun sira. Ami-nia tékniku sira sei mai halo levantamentu dadus no halo dezeñu hodi tau ba prioridade,” nia akresenta.
Tuir observasaun Agência Tatoli iha terrenu, nota katak mota Bebui sulin ba natar Beleku, enkuantu daudaun tempu ona agrikultór sira kuda hela hare, maibé labele realiza tanba mota kontinua tun ba natar laran.
Ekipa MAP hamutuk ho autoridade lokál sira tun direta hodi haree kondisaun mota ne’ebé tama ba natar laran.
Jornalista : Vitorino Lopes da Costa
Editora : Julia Chatarina
