DILI, 10 maiu 2023 (TATOLI)—Reuniaun Konsellu Ministru (KM), kuarta ne’e, aprova projetu rezolusaun Governu, ne’ebé aprezenta hosi Ministru Planu no Ordenamentu, José Maria dos Reis relasiona ho rekomendasaun ba futuru atu halo reforma iha setór infraestrutura, iha ámbitu semináriu nasionál.
Semináriu ne’e sei realiza ho tema ‘reflesaun kona-ba tinan 20 dezenvolvimentu infraestrutura iha Timor-Leste: kualidade, reziliénsia no sustentabilidade’.
“Rekomenda katak Governu tuir mai tenke promove reforma iha setór infraestrutura sira, liu-liu kontinuasaun ba dezenvolvimentu no implementasaun instrumentu planeamentu nian, dezenvolvimentu intervensaun lejizlativa no regulamentár, inklui ba implementasaun reforma sira iha organizasaun no jestaun institusionál,” Ministru Prezidénsia Konsellu Ministru, Fidelis Manuel Leite Magalhães, relata, hafoin ramata reuniaun ezekutivu, iha Palásiu Governu.
Notísia relevante : KAFI reflete kona-ba balansu dezenvolvimentu infraestrutura durante tinan 20
Objetivu hosi projetu ne’e maka atu aprova rekomendasaun sira-ne’ebé mensiona iha relatóriu finál ba semináriu nasionál infraestrutura.
Jornalista : Antónia Gusmão
Editora : Julia Chatarina
