DILI, 10 maiu 2023 (TATOLI)-Membru Komisaun B ne’ebé trata Asuntu Negósiu Estranjeiru no Defeza ho Seguransa iha Parlamentu Nasionál, David Dias Ximenes ‘Mandati’, informa, PN aprova ona projetu rezolusaun ida hodi rekoñese membru Polisia Nasionál Timor-Leste (PNTL) ho estatutu kombantente libertasaun nasionál.
“Ne’e uluk kedas ami ko’alia. Buat ida ita-nia funu ne’e, iha komponente tolu mak halo funu ida ne’e to’o ohin loron ita hetan ukun-aan, tanbá iha F-FDTL iha ona rejime espesiál ba veteranu sira atu iha promosaun no atensaun hosi ita-nia Estadu konforme artigu 11 iha konstituisaun,” Mandati hateten ba jornalista sira iha uma fukun Parlamentu Nasionál, kuarta ne’e.
Projetu rezolusaun PN númeru 125/V(5a) hodi fó rekuiñesimentu ba membru Polísia Nasionál Timor-Leste (PNTL) ho estatutu kombatente libertasaun nasionál aprova iha reuniaun plenária Parlamentu Nasionál ne’ebé hala’o iha loron 09 fulan-maiu 2023.
Nia esplika, iha rezolusaun ne’e, Parlamentu Nasionál rekomenda pontu importante hitu ba Governu hodi konsidera no tau-atensaun.
Pontu dahuluk maka louva devosaun, empeñu no espíritu misaun membru PNTL ba garantia seguransa povu Timor-Leste.
Daruak, espresa rekuñesimentu no reitera apoiu inkondisionál ba membru PNTL diariamente iha misaun defende legalidade demokrátika, garante seguransa ema ho nia sasan no asegura ezersísiu direitu, liberdade no garantia sidadaun, liuhusi filosófia polisiamentu komunitáriu.
Datoluk, rekomenda ba Governu atu realiza iha tempu badak kona-ba periódu promosaun por méritu no distinsaun iha PNTL, ba membru PNTL ne’ebé dedika iha luta ba indepedénsia nasionál, kriteira antiguidade ba serbisu Estadu.
Da-haat, Governu atu providénsia nesesáriu iha ámbitu prosesu extraordináriu promosaun, analiza atuál membru PNTL liuhusi prosesu inklui apresiasaun perkursu istóriku, disiplinár no kriminál, ho komplementu realizasaun teste koñesimentu profisionál ho avaliasaun psikotéknika no entrevista.
Da-limak, mak husu Governu kontempla membru PNTL hotu ho estatutu kombatente libertasaun nasionál iha domíniu aplikasaun rejime promosaun no graduasaun iha PNTL.
Da-neen, abertura prosesu auditória jestaun no empeñamentu operasionál hodi inkrementa no reforsa kapasitasaun plena misaun no atribuisaun PNTL, intermédiu reforma estruturál eleva PNTL padraun exelénsia.
No ikusliu maka apela ba populasaun observa orientasaun no instrusaun PNTL parseiru promordiál iha komunidade.
Enkuantu, projetu rezolusaun ne’e aprezenta hosi Deputadu proponente José Agostinho Sequeira Somotxo, David Dias Ximenes Mandati, Adérito Hugo no Cornelio Gama ‘L7’.
Jornalista: Nelson de Sousa
Editór: Agapito dos Santos
