COVALIMA, 10 maiu 2023 (TATOLI)-Komandante Polísia Munisípiu Covalima, Superintendente Polísia, Basílio de Jesus, kompromete PNTL Covalima sei garante pás no estabilidade ba povu hodi bá vota iha sentru votasaun no estasaun votasaun sira durante eleisaun parlamentár ne’ebé sei hala’o iha loron 21 fulan-maiu 2023.
“Iha tinan 2022 ita iha sentru votasaun 80 no estasaun votu 90, maibé iha eleisaun parlamentar, ita aumenta sentru votasaun 100 no estasaun votasaun 120 oinsá mak polísia atu ezerse nia funsaun, hodi asegura sentru votasaun 100. Polísia nia pepél hakarak lakoi asegura másimu no la fó espasu ba individu no grupu atu destrõe estabilidade iha eleisaun parlamentár,” nia hateten ba jornalista sira iha Kampung-Baru, kuarta ne’e.
Notísia Relevante :PNTL Covalima husu sidadaun kumpre regra iha períodu kampaña eleitorál
Atu fó susesu eleisaun lejislativa iha tinan ne’e, persiza kontribuisaun hosi autoridade hotu-hotu nian, nune’e nia husu ba administradór postu administrativu, lidér komunitária, ofisiál CNE, brigada STAE no seluktan atu servisu ho disiplina, tuir lei no imparsiál.
“Ha’u hato’o ba xefe suku no administradór postu no ofisiál CNE no brigada sira husi STAE atu disiplina no servisu tuir regra hodi fó atensaun ba joven kualker atu iha loron 20 maiu kalan labele hemu tua,” Nia hateten.
Polisia nia papel importante iha eleisaun ida ne’e maka atu asegura seguransa hahú iha loron 20 fulan-maiu polísia sei halo formatura jerál, antes akompaña materiál sensitivu no non sensitivu bá to’o sentru votasaun 100 no estasaun votasaun 120 ne’ebé estabelese iha munisípiu Covalima.
“Ita tenta meiu oinsá mak ultra pasa problema sira ne’e nune’e eventu atividade eleisaun parlamentár hahú 20 distribui materiál sensitivu no la’os sensitivu no iha loron 21 fulan-maiu sidadaun hotu bele ezerse sira-nia direitu votu hafoin kontinua kontajen iha nivél munisípiu,”nia hatutan.
Tuir dadus Polísia Nasionál Timor-Leste (PNTL) iha munisípiu Covalima iha membru hamutuk na’in 149. Husi númeru ne’e sei destaka hotu ba sentru votasaun no estasaun votasaun hodi asegura eleisaun lejislativa tinan ne’e ho susesu.
Nótisia Relevante :Janeiru-marsu, PNTL Covalima rejista kazu asidénte tráfegu 10
Jornalista :Celestina Teles
Editór :Agapito dos Santos
