DILI, 10 maiu 2023 (TATOLI)—Prezidente Repúblika Indonézia, Joko Widodo komprometidu apoia Timor-Leste halo kapasitasaun institusionál sai membru plena Asosiasaun Nasaun Sudeste Aziátiku (ASEAN, sigla inglés) ba da-XI.
“Indonézia hanesan Prezidénsia ASEAN, iha kompromisu boot tebes atu apoiu Timor-Leste nia roteiru, liuliu iha kapasitasaun institusionál hodi prepara rekursu umanu molok to’o membru plena,” Prezidente Jokowi hateten liuhosi nota ne’ebé Agência Tatoli asesu, kuarta ne’e.
Informasaun ne’e hato’o hafoin Primeiru-Ministru, Taur Matan Ruak halo enkontru bilaterál ho Prezidente Jokowi iha Otel Meruorah, Labuan-Bajo, Nusa Tenggara Timur, Indonézia, iha ámbitu simeira ASEAN ba dala-42.
Notísia relevante : PM Taur to’o ona iha Labuan-Bajo hodi partisipa simeira ASEAN
Reuniaun bilaterál ne’e hodi aprofunda liután kooperasaun entre país rua iha rejiaun ASEAN.
Prezidente Jokowi hanesan uma-na’in Prezidénsia ASEAN, fó bem-vindu ba Primeiru-Ministru Taur iha Labuan-Bajo, iha ámbitu atende simeira ba dahuluk nu’udar membru ASEAN ho estatutu observadór.
Iha reuniaun ne’e, Indonézia iha kompromisu kontinua kooperasaun bilaterál, liuliu dezenvolvimentu integradu iha zona fronteira ho Timor Osidentál. Indonézia mós preparadu ba esbosu akordu bilaterál investimentu nian hodi dudu ekonomia Timor-Leste ba oin hanesan membru ASEAN.
Biban hanesan, Xefe Governu Timor-Leste, agradese ba konvite espesiál hosi Prezidente Jokowi hodi partisipa iha simiera ASEAN.
Aproveita biban ne’e, Primeiru-Ministru Taur reiteira filafali Timor-Leste nia agardesimentu ba apoiu inkondisionál Indonézia dezde tinan 2021 ba adezaun Timor-Leste ba ASEAN inklui apoiu ba kapasitasaun institusionál.
Iha enkontru ne’e, Xefe Governu hetan akompañamentu hosi Ministra Negósiu Estranjeiru no Kooperasaun, Adalzija Magno.
Antes ne’e, Timor-Leste hato’o pedidu adezaun ba ASEAN iha tinan 2011, nune’e daudaun sai ona membru ho estatutu onservadór.
Aleinde ne’e, Ministériu Negósiu Estranjeiru no Kooperasaun (MNEK) kontinua analiza kle’an polítika no kuadru regulamentár, ne’ebé sei aprezenta ba Konsellu Ministru hodi halo aprovasaun no halo mós elaborasaun dokumentu rejime komérsiu externu no enkuadramentu legál sira.
ASEAN kompostu hosi nasaun 10 hanesan Cambodia, Indonézia, Laos, Vietname, Brunei Darusalam, Singapura, Myanmar, Filipina no Thailándia.
Jornalista : Antónia Gusmão
Editora : Julia Chatarina
