iklan

DILI, POLÍTIKA

Bankada parlamentár laiha vontade polítika ba eleisaun komisáriu CAC

Bankada parlamentár laiha vontade polítika ba eleisaun komisáriu CAC

Uma Fukun Parlamentu Nasionál,Imajen Egas Cristovão

DILI, 11 maiu 2023 (TATOLI)—Sekretária Meza Parlamentu Nasionál (PN), Deputada Lídia Norberta, hateten bankada parlamentár ida-idak laiha vontade polítika ba prosesu eleisaun komisáriu Komisaun Antí-Korrupsaun (CAC, siglá portugés).

Notísia Relevante: Diskusaun alterasaun-lei CAC hein ajenda hosi meza PN

“Nia fukun ne’e la’ós hosi Governu no Governu haruka tiha ona (kandidatu) mai Parlamentu no la’ós Parlamentu Nasionál, maibé nia fukum ne’e iha vontade polítika iha bankada Parlamentár ida-idak atu asegura korum hodi bele halo eleisaun. Se ita la aseita ho kandidatu ne’ebé Governu indika, ita bele hato’o rejeisaun liuhosi sentidu votu iha Parlamentu. nune’e, kaer ba ida-ne’e Parlamentu rejeita Governu bele halo fila-fali proposta foun. Maibé, hanesan agora daudaun meza ajenda beibeik ba plenária, maibé to’o ikus deputadu sira la asegura maiória prezensa hodi bele halo votasaun ba ida-ne’e,” Sekretária Meza PN, Lídia Norberta, hateten ba jornalista sira iha PN, kinta ne’e.

Nia dehan, ida-ne’e la’ós sala hosi meza Parlamentu Nasionál (PN) nian maibé laiha vontade polítika hosi bankada parlamentár ida-idak.

“Meza nia hakarak antes mandatu ne’e ramata tenke iha ona komisáriu CAC foun, maibé agora fila-fali ba bankada ida-idak hodi marka prezensa iha plenária. Se la aseita ho lista ne’ebé Governu fó, entaun hatudu liuhosi sentidu votu,” nia hateten.

Deputada Lídia hatutan, se votu ne’e kontra entaun kandidatu ida-ne’e la hetan votu maiória entaun Governu hatene an halo fali proposta foun ida-ne’e bele tuir lójika hanesan ne’e maibé deputadu sira lakohi kontribui hodi halais prosesu ne’e mak problema.

“Tambá ne’e, konsesu tenke hatudu liuhosi plenária no meza laiha kompeténsia atu haruka fila no meza PN nia dever mak ajenda hela. Agora, kompeténsia ne’e tenke fila-fali ba Deputadu ida-idak nia kompromisu atu bele hatudu hosi sentidu votu,” nia dehan.

Kona-ba inisiativa atu halo alterasaun lei CAC lao hela no dadaun iha períodu kampaña eleitorál, nia dehan, tanba Deputadu ida-idak sei hala’o nia kompromisu polítiku, entaun bainhira atividade kampaña eleitorál termina mak sei kontinua diskute.

Entretantu, meza PN ajenda ona iha plenária ba eleisaun komisáriu CAC maibé labele realiza tanba presiza Deputadu prezente na’in-49, no Deputadu maiória hosi bankada opozisaun liu-liu CNRT mak auzente iha plenária.

Antes ne’e mós bankada CNRT hato’o ona pozisaun katak presiza diskute didi’ak kona-ba kandidatu komisáriu CAC ne’ebé Governu hato’o tanba presiza haree ema-ne’ebé independente hodi hala’o serbisu servi instituisaun importante hanesan CAC, bankada CNRT mós hato’o sira-nia karta justifikasaun ba meza PN razaun sira auzente iha plenária.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!