MANATUTO, 11 maiu 2023 (TATOLI)—Diretór Komisaun Nasionál Eleisaun (CNE), munisípiu Manatuto, Paulino Soares, hateten preparasaun ba Eleisaun Parlamentar 2023 nian ne’e funsionáriu CNE munisípiu no nasionál tuir formasaun kona-ba prosesu apuramentu nasionál.
Notísia Relevante: CNE fó atensaun ba líder Parpol insulta malu iha períodu kampaña
“Durante loron rua, hahú kinta-sesta (10-12 maiu 23), CNE Manatuto hamutuk na’in-haat tuir hela formasaun kona-ba prosedimentu apuramentu nasionál ba eleisaun parlamentár tinan ne’e. Tanba, iha prosesu kontajen buletin votu ne’e funsionáriu CNE mak sei hola parte mós iha laran, nune’e liuhosi formasaun ne’e bele mellora di’ak liután ita-nia kapasidade,” nia hateten ba Agência Tatoli liuhosi telefónika, kinta ne’e.
Formasaun ne’e, CNE nasionál mak realiza nune’e durante loron rua funsionáriu CNE iha territóriu nasionál tuir no sei konfere akta rezultadu hosi kada sentru votasaun sira-ne’ebé submete hosi STAE hafoin halo apuramentu munisipál durante oras 48 nia laran.
“Ida-ne’e, ita presiza duni tuir formasau no rona esplikasun nune’e aumenta ita-nia koñesimentu no abilidade hodi oinsá partisipa iha apuramentu nasionál,” nia dehan.
Prezidente Komisaun Nasionál Eeleisaun (CNE, sigla portugés), José Agostinho da Costa Belo, hateten funsionariu CNE hotu tenke mantein hatudu profisionalidade no responsabilidade, nune’e bele fó garantia ba susesu eleisaun 2023.
Tuir dadus, funsionáriu CNE sira-ne’ebé partisipa iha formasaun ne’e mai hosi nasionál no munisipál hamutuk 92, nune’e mós hola parte hosi ofisiál supervizaun eleitorál nasionál .
Jornalista : Osória Marques
Editór : Cancio Ximenes
